سنة 1998، إنضمّت Cadillac لفئة SUV الضخمة والفخمة كتير، من خلال تقديما Escalade يلّي تميّز من البداية بحضورو القوي على الطريق. واليوم، ومع إطلاق الجيل الرابع فينا نحكي عن تطوّر على مختلف المستويات، خاصة داخل ال Cabin.

والبداية متل العادة، مع التصميم الخارجي يلّي بالرغم من خضوعو لمجموعة كبيرة من التحسينات، بقي وَفِي لشخصيّة Escalade، خاصة لجهة الرصانة، والقياسات الكبيرة، والوقفة الفخمة على الطريق. وما أثّرت زيادة الطول بنسبة كبيرة، بالتزامن مع خفض الإرتفاع، على طبيعة هالسيارة العملانية الضخمة، مع طول بزيد عن الخمس أمتار بمقدار 18 سنتيمتر بالفئة القياسية، ومع عرض بزيد على مترين. والواجهة الأماميّة عصريّة مع شبكة تهوية أو Grill فخم. والخطوط الجانبية سلسة وإنسيابية. وبالخلف، بتطغى العملانية على الشكل العام. والإضاءة الأمامية والخلفية صارت تستفيد من تقنيّة LED للإنارة بالنهار والليل.     

وبالإنتقال لل Cabin، عم نحكي عن غرفة إستقبال على إطارات، باعتبار إنّو من الممكن نقل 8 ركّاب، بظلّ أجواء رفاهيّة وفخامة كتير عالية. ومن الضرورة الإشارة إنّو مع الجيل الرابع صارت المقاعد بتوفّر راحة أعلى من السابق، وثبات أكتر كمان. واللافت إنّو المقاعد الأماميّة مزوّدة بنظام تهوية داخلية، مع خيار بين الهوا الساخن أو البارد. والتصميم الداخلي الجديد بضمّ مواد مطرّزة، مع خيارات من الخشب مُختارة بعناية لتأمّن الجاذبيّة واللمسة الجمالية المطلوبة. وبتستفيد هال Cockpit الهادية والمعزولة عن الضجيج الخارجي، من تجهيزات راحة كتيرة ومتطوّرة. وبيتولّى نظام Bose الصوتي، تأمين الأجواء الموسيقيّة المرغوبة بال Cabin، بالوقت يلّي بأمّن ال AC الفعّال تبريد الأجواء بسرعة كبيرة بغض النظر عن درجة الحرارة الخارجيّة. ومن الضروري الإشارة إنّو نظام CUE للتواصل الرقمي المتطوّر من إنتاج Cadillac، بيتوفّر ب Escalade الجديدة قياسياً، مع أدوات تحكّم بتشتغل باللمس، مشابهة بحركتا للتقنيات المستخدمة بعالم الهواتف "الذكيّة" أو Smartphone والألواح الرقمية أو Tablets. أكتر من هيك، بإمكان السايق الإختيار بين أربع أنواع مختلفة لطبيعة تشغيل لوحة العدّادات أو ال Dashboard، والإستفادة من نظام Head-up-display لعرض المعلومات على الجزء الداخلي من الإزاز الأمامي. وتقنيّة Bluetooth متوفّرة كمان لتشغيل الهاتف المحمول عن بعد، ونظام الملاحة أو ال Navigation System جاهز من جهتو لتوجيه السايق للوجهة المرغوبة.

منذكّر إنّو Escalade بيتوفّر إضافة للفئة القياسيّة، بنسخة ESV يلّي بتتميّز بطول إضافي بيبلغ 35 سنتيمتر على مستوى قاعدة العجلات أو ال Wheelbase، وبطول إجمالي بزيد بمقدار 50 سنتيمتر مقارنة بالفئة ال Standard. وهالشي سمح بتعزيز المساحات المتوفّرة لركّاب الصفّ التالت من المقاعد، ولرفع قدرات التحميل بالصندوق يلّي مزوّد بباب كتير مميّز من الممكن فتحو من دون إستخدام الإيدان مع قدرة على برمجة درجة الإرتفاع المرغوبة. يعني عملانيةEscalade يلّي كانت كتير منيحة بالسابق، صارت حالياً ممتازة! ورفاهيّة الركّاب مكفولة من خلال نظام DVD بيستخدم تقنية العرض المتطوّرة والنقيّة كتير Blu-Ray، علماً إنّو ال Cabin مزوّدة بشاشة عرض مثبّتة بالسقف قياس 9 "إنش"، بينما الفئة ESV بتستفيد من شاشتين من نفس القياس كمان.

وبالنسبة لتجهيزات السلامة، تمّ تعزيز مجموعة وسايد الهوا، عبر إضافة Airbag وسطي بالجهة الأماميّة، بيهدف لحماية الراكب يلّي بكون جالس بعكس جهة الإصطدام. واللافت إنّو مجموعة ال Airbags معزّزة من خلال مجموعة مساند راس أو Headrests كاملة، وأحزمة أمان مزوّدة بتقنيّة الشدّ الأوتوماتيكي بحالات الخطر.    

ميكانيكياً، Cadillac Escalade 2015 بتستفيد من محرّك V8 سعة 6,2 ليتر بولّد 420 حصان، مع عزم دوران أو Torque بيوصل لحدود 623 حصان عند 4100 دورة بالدقيقة، يعني بزيادة بنسبة 5 % على مستوى الطاقة الحصانية، وبنسبة 10 % على مستوى عزم الدوران، مقارنة بالجيل السابق. وهالمحرك المتطور والمزوّد بأنظمة مختلفة لخفض معدّل إستهلاك البنزين، موصول بنظام لنقل الحركة، بينتمي لفئة Hydra-Matic، علماً إنّو ال Gearbox الأوتوماتيكية بتتكوّن من ست نسب أمامية، مع تحكم يدوي إختياري بالنسب. والدفع بالإطارت الأربعة لمزيد من الفعالية على الطرقات الوعرة.

وبسّ نحكي أداء، ما بدنا ننسى إنّو وزن Escalade فاضية بيبلغ 2651 كيلوغرام. ولكن هالشي ما منع المهندسين من تأمين قدرات تسارع نشيطة، ومن وضع قوّة عالية بتصرّف السايق. والتسارع من صفر لمية كيلومتر بالساعة بتمّ خلال 6 ثوان بسّ. وكان من الضروري رفع مستوى فعاليّة ال Brakes لتأمين سرعة كبح مناسبة، مدعومة ب ABS مع توزيع إلكتروني لضغط الكبح على الإطارات، حسب الحاجة. أمّا قدرة السحب والجر فبتبلغ  أكتر من 3500 كيلوغرام. 

والتوازن مكفول بفضل تطوّر ال Suspensions يلّي بيستفيدو من تحكم إلكتروني مغناطيسي، بالتزامن مع إستخدام محور خلفي جديد ونظام تحكم إلكتروني بالثبات، بعزّز فعالية نظام الدفع بالإطارات الأربعة، والمزوّد بتحكم أوتوماتيكي بحركة ال Differential. وما مننسى إنّو الإطارات بيتميزّو بقياساتن الكبيرة مع 20 "إنش". وبساعد نظام التوجيه الإلكتروني الجديد بتحسين التحكم.

وأبرز التجهيزات الإلكترونية المستخدمة ب Cadillac Escalade الجديدة، نظام كبح تلقائي، بيستخدم تقنيّة رادار بموجات قصيرة، إلى جانب مجموعة من أجهزة التحسّس والإستشعار أو ال Sensors، لإكتشاف أيّا خطر أمامي أو خلفي. وهال Braking System الأوتوماتيكي المتطوّر، بحاول بالبداية تحذير السايق لوجود الخطر، قبل ما يتدخّل بشكل كامل، في حال عدم الإستجابة.   

وإضافة لنظام تنبيه السايق من خطر وقوع حادث إصطدام أمامي، بتمّ تنبيهو كمان بمجرّد خروج Escalade عن خط سَيرَا. والتحذيرات الصوتية والبصريّة بتتعزّز من خلال إهتزاز مقعد السايق، وهيّي تقنيّة سلامة كتير متطوّرة.

من جهة تانية، تمّ إستخدام نظام تثبيت أوتوماتيكي للسرعة، مع ميزة السرعة المتأقلمة، بمعنى إنّو سرعة السير بتتبدّل تلقائياً تبعاً لحركة السير أمام Escalade. يعني بتخفّ السرعة أوتوماتيكياً بسّ تبطأ حركة السير الأمامية، وبترجع ترتفع من جديد بسّ تفتح الطريق.

وأكيد إنّو Cadillac Escalade 2015 بتملك كلّ المميّزات المطلوبة للمنافسة ضمن أفخم وأقوى وأكبر سيارات SUV.