سنة 1989 أطلقت Infiniti سيارة Coupe ديناميكيّة وفخمة بإسم M30، ولكنّها لم تنجح، وتوقّف إنتاجا بعد ثلات سنوات فقط. وسنة 2002، رجعت سيارات M بنسخة Sedan، وخضعت لسلسلة تحسينات وتقدّمت بأكتر من جيل على مدى 12 سنة، وصولاً لسنة 2014 وقتا تمّ تبديل الإسم ل Q70، بالتزامن مع تبديل أسماء مختلف سيارات هذه الشركة اليابانيّة الفاخرة.
ومع Infiniti Q70 2016 المُحاولة واضحة لتقديم Sedan كبيرة وفخمة ما تشبه إلا حالا. وبهالإطار يُعتبر التصميم الخارجي من بين الأجمل بالفئة يلّي بتنافس فيا، من دون تقليد أيّ سيارة منافسة ولا الإستعانة بأيّ مُكوّن شبيه. الواجهة الأماميّة هُجُومية، مع فتحات متعدّدة، وعاكس هوا أو Spoiler رياضي. ومن الجوانب، بتبرز الرفاريف المنفوخة، وكمان الخطوط المتموّجة على طول السيارة يلّي بيبلغ 4 متار و94 سنتيمتر، ويلّي بتأكّد الطابع الديناميكي، مِتلا مِتل مَخارج ال Exhaust. ومن الجهة الخلفيّة، الطابع العصري مِأمَّن من خلال مصابيح الإضاءة الحمرا، مع بروز خطوط ال Chrome. ودَخَّل المهندسين تعديلات طفيفة على شكل مصابيح الإضاءة وعلى شبكة التهوئة أو ال Grill، لمزيد من الجاذبيّة. وبالنسبة للإطارات فهيّي بتتمتّع بتصميم كتير جريء وبتتوفّر بقياسات بتتراوح بين 18 و20 "إنش".
وداخل المقصورة، الأبرز بيتمثّل بنجاح المُصمّمين بالجمع بين الشكل الكلاسيكي الأصيل من جهة، والشكل المُستقبلي لكتير عصري من جهة تانية. وهالشي منح Q70 شخصيّة فريدة من نوعا بوجّ المنافسة الواسعة، خاصة من قبل سيارات Sedan الرياضية والمترفة من إنتاج ألماني. ومن الممكن بسهولة ملاحظة لوحة القيادة أو ال Dashboard مع الخطوط المتموّجة متل التصميم الخارجي. وحضور الخشب الفخم داخل المقصورة واضح، متلو متل ال Chrome وغيرن من المواد المترفة كمان. وبتبرز المقاعد المريحة والمغطّاية بالجلد الفاخر، مع تسجيل تحسّن طفيف على مستوى المساحات المخصّصة للركّاب بالجهة الخلفيّة. وتمّ كمان رفع عدد تجهيزات الراحة والترفيه المتوفّرة قياسياً داخل ال Cabin يلّي بتستفيد من مجموعة كاملة من تجهيزات السلامة، أبرزا وسايد هوا أو Airbags متطوّرين، ومساند راس أو Headrests بيتحرّكوا مع حركة الراس لتجنّب وقوع ضرر برَقبة أيّا راكب. ومن الممكن إضافياً الإستفادة من مقاعد مزوّدة بنظام تبريد داخلي، ومن DVD مع شاشات عرض مدمجة. ومن بين التحسينات، زيادة العزل الصوتي عن الضجّة الخارجيّة.
ميكانيكياً، المحرك المتوفّر قياسياً ب Infiniti Q70 2016 هوّي V6 بسعة 3,7 ليترات، بولّد 329 حصان. وإضافياً من الممكن إختيار محرك V8 بسعة 5,6 ليترات بولّد 402 أحصنة. وببعض الأسواق العالمية، وضعت إنفينيتي نسخة Hybrid بتصرّف المستهلكين، علماً إنّو المحرك الحراري المدعوم بمحرك كهربائي هوّي من فئة V6.
وبشكل عام، محرّكات Q70 مقبولة بالنسبة لإستهلاك البنزين، وهيّي كفيلة بتأمين أداء نشيط وقوي لهالسيارة الكبيرة ويلّي بيبلغ وزنا 1755 كيلوغرام بأخفّ فئة مِنّا، باعتبار إنّو إختيار محرك V8 بدلاً من V6 بزيد الوزن بمقدار 80 كيلوغرام، وإختيار نظام الدفع الرباعي إضافياً ببعض الأسواق بدلاً من الدفع بالإطارات الخلفيّة بزيد الوزن بمقدار 90 كيلوغرام.
ولكن هالشي ما كتير بأثّر على الأداء الإجمالي، باعتبار إنّو التسارع من صفر لمية كلم/س. بتمّ خلال 6,2 ثوان مع محرك V6 وخلال 6 ثوان بسّ مع محرك V8. وهالرقم بينخفض أكتر مع الفئة الهجينة. واللافت إنّو السرعة القصوى بتبلغ 250 كلم/س. بكل الحالات.
إشارة إنّو ال Transmission أوتوماتيكيّة من 7 نسب أماميّة، مع إمكان تبديل هالنسب يدوياً في حال الرغبة. والدفع بتمّ بالإطارات الخلفية، مع إمكان إختيار نظام الدفع الرباعي All Wheel Drive متل ما سبق وذكرنا. وأكيد هالنظام بيلعب دور كبير بتعزيز التوازن العام، وبيرفع من سيطرة السايق على الأداء. وكان من الضروري كمان زيادة فعاليّة المكابح، وتحسين مكوّنات ال Suspension، ودايماً لتأمين أعلى ديناميكيّة ممكنة خلف المقود. ومن ضمن الخيارات المتاحة للسايق، وضعيّة دفع رياضيّة بترفع من البرمجة الديناميكيّة العامة للتجهيزات، إضافة طبعاً لوضعيّة إقتصادية بإسم Eco Mode في حال الرغبة بتخفيف إستهلاك البنزين، على حساب تراجع الأداء النشيط طبعاً.
وبتستفيد Infiniti Q70 من هيكل متوازن، ومن نظام إلتفاف بيستخدم الإطارات الأربعة لمزيد من الفعالية كخيار إضافي، ومن نظام تحكم إلكتروني بالثبات وبالتماسك بيتميّز بسرعة تدخّل كتير كبيرة وبالوقت المناسب. ومن جهة تانية، من الممكن الإستعانة بكاميرات تصوير وبأجهزة تحسّس بالجهات الأربعة لتسهيل عمليّة ركن السيارة. وتجهيزات السلامة كتيرة، وبتشمل التحذير من مخاطر وقوع حادث، والتنبيه لوجود سيارات قريبة، وكمان عند الخروج عن خط السير، وغيرا.
وبالختام، أكيد إنّو Infiniti عم تحاول من خلال Q70 لسنة 2016، تقديم خيار مختلف ومميّز لمحبّي سيارات Sedan الكبيرة والفخمة والديناميكيّة. وأكيد إنّو كتير من المُستهلكين يلّي ما بحبّوا يكونوا متل غيرن، ما رح يتردّدوا باختيار Q70 يلّي ممتعة للنظر من الخارج والداخل، ويلّي ممتعة للسايق خلف المقود وللركاب كمان.