M3 هيّي النسخة الديناميكيّة من سيارات الفئة التالتة من إنتاج BMW، وتحضيرا بتمّ من قبل قسم رياضة السيارات أو ال Motorsport Division التابع للمجموعة البافاريّة. وحُضورا بالأسواق مستمرّ من سنة 1985 لليوم.

ومع الطراز الأجدد، نجحت BMW بتخفيف وزن M3 بحوالى 80 كيلوغرام مقارنة بوزن الجيل السابق، نتيجة إستخدام الألومنيوم والكربون على مستوى الأغطية والرفاريف وغيرا من المكوّنات ضمن هيكل وجسم السيارة. ومن ضمن الخيارات يلّي متوفّرة إضافياً لأوّل مرّة ب M3 Sedan سقف مصنوع من الكربون.

من الخارج، التصميم العام مَنّو كتير بعيد عن جينات الفئة التالتة عموماً، مع بعض المكوّنات يلّي بتأكّد الطابع الرياضي المعزّز، متل تموّج غطا المحرك، وعاكس الهوا أو ال Spoiler الأمامي، والشفرات الجانبيّة يلّي بتكمّل جاذبية وحضور الإطارات قياس 19 "إنش" والمرايات. والهدف من التمايز التصميمي مشّ بسّ زيادة الجاذبية على الطريق، وتأكيد الطابع الديناميكي، ولكن تحسين الإنسيابية كمان، والمساهمة بتحسين الثبات والتماسك يلّي مِأمّنين بفضل توزيع مدروس للوزن العام، وإنخفاض "نقطة التقل"، وإستخدام محاور دوران وإطارات عريضة. 

وبالإنتقال للداخل، المواصفات الديناميكيّة كتير واضحة، من المقاعد الرياضيّة يلّي تمّ تحسينا على مُستوى الراحة والثبات يلّي بتأمّنن، مروراً بشعارات M، وصولاً للكربون يلّي بغطّي كتير من المكوّنات. والنفس الرياضي العام مَنّو على حساب تجهيزات الراحة والسلامة يلّي ما بتقلّ عن أيّا طراز آخر فخم من BMW. 

وطبعاً الميزة الأبرز ل M3 الجديدة بتبقى المحرك الخارق، ويلّي إرتفعت قُوّتو بمقدار 11 حصان، لتبلغ 431 حصاناً، مع إنّو تمّ الإستغناء عن محرك V8 بسعة 4 ليترات، لصالح محرك من 6 أسطوانات متتالية سعة 3 ليترات، مع 2 "توربو". واللافت إنّو سرعة دوران هالمحرك ممكن توصل ل 7600 دورة بالدقيقة، وهالشي مميّز بالفئة Turbo.

ومن ضمن التحسينات يلّي نقلت أداء M3 لمستويات جديدة، ترس تفاضلي أو Differential متطوّر بتحكم إلكتروني كتير دقيق، بأمّن تبديل توزيع القوة بين إطارات المحور الخلفي حسب الحاجة، بسرعة أعشار من الثانية الواحدة، وبنسبة بتتراوح بين صفر ومية بالمية من القوّة المستخرجة من المحرك.

ومنذكر كمان ال Transmission الجديدة من فئة M-DCT ، ويلّي بتتكوّن من سبع نسب أماميّة مع تِنين Clutch ، وبتتميّز بتأمينا سرعة إنتقال كبيرة بين النسب، علماً إنّو خيار ال Gearbox اليدويّة من ست نسب متوفّر ليلّي بحبّ.  

وكل هالمواصفات بتساعد BMW M3 يلّي ما بيتجاوز وزنا الإجمالي 1520 كيلوغرام، على التسارع من صفر لمية كيلومتر بالساعة خلال 4,1 ثوان، علماً إنّو السرعة القصوى محدّدة إلكترونياً عند 250 كلم/س. والمكابح القياسيّة فعّالين، مع إمكان إختيار أسطوانات مصنوعة من السيراميك لتأمين قدرات كبح أفضل.   

ومنبقى مع التحسينات الميكانيكيّة، ومن ضمنا ال Suspension يلّي صارت أخفّ من السابق، مع زيادة عدد وصلات التثبيت لمزيد من الفعالية. ومن الممكن إضافياً إختيار نظام تحكم متأقلم بالتعليق، بإسم Adaptive M Suspension، بيسمح للسايق الإختيار بين أكتر من برنامج عمل، متل وضعيّة القيادة المريحة أو الرياضية أو الرياضية المعزّزة. ومع كل وضعيّة مختارة، بتتبدّل برمجة ال Suspension وكمان المقود يلّي صار مِزَوّد بمساعد كهربائي بدل المساعد الهيدروليكي السابق. والبرامج الإلكترونية متوفّرة كمان لعمل ال Transmission.

​

ومن الممكن الإستفادة إضافياً من تجهيزات إلكترونية متطوّرة، لتسهيل عمليّة الركن، ولمنع الخروج عن خط السير، ولتنبيه السايق من السيارات إلى جانبو، وغيرها من الأنظمة المتطوّرة.

وبالنهاية، ما فينا نقول عن BMW M3 إلا إنّا خيار مناسب لمحبّي القيادة اليومية بسيارة مريحة بتتمتّع بأداء رياضي ألماني أصيل، وتحديداً ليلّي بفضّلو يكونوا من الأقليّة المميّزة على الطريق بفضل مواصفات فرع M.