Polaris هيّي شركة أميركيّة متخصّصة بإنتاج الدراجات النارية أو ال Motorcycles، ومركبات التلج أو ال Snowmobiles، وكمان "مركبات كل الطرقات" يعني All Terrain Vehicle المعروفة إختصاراً بإسم ATV.
ومع Polaris Jagged RZR XP900 H.O. رح نتعرّف على ATV منتجة بعدد محدود، بتتميّز بمواصفات رياضية معزّزة ومتوفّرة بشكل قياسي من الشركة من دون أيّا تعديلات خارجيّة.
وهالشي بينطبق على جسم ال Vehicle المزوّد بأبواب من الشركة، بتمايز واضح عن غير فئات من هال ATV. ومنلاحظ إستخدام الألوان البيضا والسودا والزرقا لزيادة الجاذبيّة، مع لمسات من وحي سيارات السباق.
وداخل ال Cabin، بتتميّز هالفئة الخاصة بإنّا بتأمّن أفضل راحة جلوس نتيجة طول قاعدة العجلات أو ال Wheelbase يلّي بيزيد بمقدار 66 سنتيمتر عن الفئات التانية من RZR، وكمان بفضل إستخدام أفضل مقاعد متوفّرة بالسوق لمركبات ATV. ومساحات الجلوس واسعة، علماً إنّو العملانية بتشمل علبتين للتخزين بالجهة الخلفيّة، من الممكن إخراجن في حال الرغبة.
بالنسبة للمحرك، وإنطلاقاً من ال Engine المستخدم ب RZR XP 900 بقوّة 88 حصان، إشتغل المهندسين التابعين لشركة Polaris على رفع ال Horsepower لتبلغ 94 حصان، مع تحسين التسارع أو ال Acceleration بنسبة 17 %. وتم إعتماد نظام تبريد داخلي للمحرك ما بيعتمد على الهوا.
وإضافة للمحرك القوي، بيبرز ال Steering المزوّد بمساعد إلكتروني، لتسهيل مهمّة الإلتفاف ولتعزيز سهولة التحكم، خاصة إنّو الإطارات تقيلة.
وال Suspensions بتتمتّع بمتانة وفعالية كبيرة، مع هامش إنغلاق أو Travel بيوصل لأكتر من 34 سنتيمتر بالأمام، ولأكتر من 35 سنتيمتر بالخلف. وهالشي بعزّز قدرات عبور هال ATV على الطرقات الوعرة، خاصة إنّو من السهل الإنتقال لنظام الدفع بالإطارات الأربعة خلال القيادة.
أمّا نظام ال Braking فهوّي بيستفيد من أربعا Discs مع تحكّم هيدروليكي، قادر بسهولة السيطرة على إندفاع هالمركبة يلّي بيبلغ وزنا 694 كيلوغرام. وما مننسى الإطارات الكبيرة والمزوّدة بنقشات خاصة بالطرقات الوعرة، مع Wheels قياس 12 "إنش". والإرتفاع عن الأرض، أو ال Ground Clearance بيوصل لأكتر من 31 سنتيمتر، وهايدا رقم مميّز، وبحسّن قدرات العبور.