سنة 2009، ومن معرض Frankfurt الدولي للسيارات، أطلقت Aston Martin أوّل سيارة Limousine من إنتاجا من 20 سنة، هيّي Rapide يلّي بدأ إنتاج الفعلي سنة 2010، علماً إنّو تمّت بوقتا الإستعانة بكتير من تقنيات وتكنولوجيا DB9. وسنة 2013، قدّمت Aston Martin مجموعة من التحسينات الكبيرة، زادت جاذبيّة وقوّة هالسيارة يلّي صارت تحمل إسم Rapide S.
وإضافة للهيكل المصنوع من ال Aluminum، هالسيارة الرياضية والفخمة بنفس الوقت، بتستفيد من طول بزيد على خمس أمتار، ومزوّدة بجسم من أربع أبواب، علماً إنّو الأبواب بالخلف شبه مخفيّين بخطّ السقف الإنسيابي. والخطوط سلسة، مع تموّجات وفتحات تهوئة بتعزّز النَفَس الرياضي، وإنارة عصريّة وفعّالة.
بالإنتقال لل Cabin، الفخامة واضحة بالعين المجرّدة، وكمان من خلال حاسة اللمس، مع زينة من الجلد والخشب وال Carbon. والمقاعد رياضيّة ومستقلّة بالجهتين الأمامية والخلفيّة، مع صندوق تحميل عملاني. وال Dashboard بليق بسيارة بريطانية أصيلة، مع تحكّم سهل بكل تجهيزات ال Console الوسطي.
ميكانيكياً، Rapide S مزوّدة بمحرّك V12 سعة 6 ليترات، بولّد 558 حصان، مع عزم دوران أو Torque بيوصل لحدود 620 "نيوتن متر". وال Gearbox أوتوماتيكيّة من ست نسب أماميّة. ومع إنّو الدفع بتمّ بالإطارات الخلفيّة، الإنزلاق ممنوع بفضل تحكم إلكتروني بال Differential، إضافة لنظام تحكم إلكتروني بالثبات ESP. وما مننسى فعاليّة ال Suspensions يلّي بيستفيدو من نظام إلكتروني للتحكم بالقساوة وبحركة التموّج، علماً إنّو الإطارات قياس 20 "إنش".
وبالنسبة لأداء Aston Martin Rapide S يلّي بيبلغ وزنا حوالى 2000 كيلوغرام، فهوّي كتير مميّز، مع قدرة على التسارع من صفر لمية كيلومتر بالساعة خلال 5 ثواني، علماً إنّو ال Acceleration بتضلا نشيطة على مختلف السرعات. والسرعة القصوى أو ال Maximum Speed بتتجاوز ال 300 Km/h، وبتوصل ل 306 كيلومتر بالساعة بالتحديد. وللسيطرة على هالأداء القوي، كان من الضروري إستخدام مكابح كتير فعّالة مع Discs من الحجم الكبير، ونظام ABS لمنع الإنغلاق.
بالنهاية، أكيد إنّو Aston Martin Rapide S بتملك كل المواصفات يلّي بتأهّلا لمنافسة سيارات Sport – Sedan الألمانية الفخمة والقويّة الأداء. ومن خلالا بوجّه السايق رسالة تمايز بإنّو صاحب شخصيّة نشيطة وفريدة، وما بتمشي بالصفّ، تماماً متل Rapide S!