Range Rover Sport صار أجمل وأقوى ومميّز أكتر، من خلال تعديلات Startech يلّي طالت الخطوط الإنسيابية، والإطارات، وال Exhaust، وأنظمة التعليق (Suspensions)، والأداء العام، وغيرا. وكل هال Bodykit الإختياري، مصنوع بجودة عالية وبكفالة OEM. ومن الضروري نذكر إنّو هالتعديلات، هيّي بالأصل من تحضير شركة Brabus، يلّي بتستخدم أسماء مختلفة بس تعدّل غير سيارات Mercedes. لهيك عم نحكي عن تعديلات Startech ل Range Rover.

تصميمياً، منلاحظ التغيير يلّي لحق بالصادم الأمامي (Front Bumper) مع عاكس الهوا (Spoiler) الرياضي، وبالجزء الخلفي يلّي صار بيتضمّن Exhaust جديد مع أربع فتحات مصنوعين من ال Stainless-steel، وDiffuser بالوسط مصنوع من الكربون. والتصميم المميّز، بيشمل الرفاريف العريضة، والإطارات الرياضية، والإنارة الجذابة ويلّي بتستخدم تكنولوجيا LED مع إضاءة بالنهار، وفتحات التهوية الكبيرة قدّام ومن الجوانب، والجناح الخلفي (Rear Wing) الكبير ويلّي بزيد الضغط العمودي أو ال Downforce على المحور الخلفي (Rear Track). وبشكل عام، حافظ Startech Range Rover على شخصيّة هالفئة المميّزة من سيارات SUV، ولكن مع إدخال مجموعة من التعديلات والتحسينات يلّي زادت الطابع الرياضي بشكل كبير، ويلّي بتكفل لفت النظر والحصول على الإهتمام على الطريق.

ومن ضمن التعديلات يلّي مش ممكن ملاحظتا على مستوى الشكل، زيادة العرض العام بمقدار خمس سنتيمترات، بسبب كل هال Panels المصنوعين من الكربون، وال Wheels قياس 23 إنش، ويلّي بيتمتّعوا بتصميم كتير رياضي.

وداخل المقصورة (Cabin)، قدّمت Startech مجموعة واسعة من التحسينات الداخليّة، بتبلّش مع جلد من نوعيّة كتير فاخرة، مع تغييرات واضحة على مستوى لوحة العدادات (Instrument Panel) والأجزاء الداخلية للأبواب. ومن ضمن المميّزات يلّي بتزيد الطابع الرياضي للمقصورة، Nappa Leather بلون أسود حلو مع خياطة بلون أحمر بتأمّن تناقض كتير جذّاب. واللون الأحمر بيمتدّ على السجاد بالأرض. وتمّ كمان إستخدام أخشاب Exotic ومكوّنات أو Components مصنوعة من الكربون.   

​

ولإنّو Startech Range Rover تقدّم بأوروبا، التعديلات الميكانيكيّة طالت ال 3 Liter V6 يلّي مزوّد ب Twin Turbo ويلّي بيشتغل بالديزل. وتمّ تأمين 31 حصان إضافي، و79 "نيوتن متر" إضافي كمان، لترتفع القوة لحدود 323 حصان، والعزم أو ال Torque لحدود 672 "نيوتن متر".

وهالشي كان كفيل بخفض توقيت التسارع من صفر لمية كلم/س. من 7,2 ثوان، ل 6,9 ثوان. وهالتوقيت كتير منيح ل SUV من الحجم الكبير، مع وزن مرتفع نسبياً، وبيترافق مع هدير دوران رياضي بيصدر عن ال Exhaust الخاص.

وتمّ من جهة تانية تعزيز الثبات والتماسك أكتر، من خلال خفض إرتفاع ال Suspensions بمقدار 2,5  سنتيمتر، بالتزامن مع إعتماد إطارات عريضة، متل ما ذكرنا. 

بالنهاية، صحيح إنّو Range Rover وبالتحديد الفئة Sport مِنّو، مَنّا بحاجة لأيّ إضافات لتلفت النظر على الطريق، ولكن الأصحّ إنّو مع تعديلات Startech هال SUV صار أجمل وأفخم بشكل واضح، وصار أقوى بشكل ملموس.