سنة 1956 بلّشت Porsche تخطّط لتقديم سيارة رياضيّة جديدة تاخد مكان 356، وسنة 1963 ومن معرض Frankfurt الدَولي أطلقت Type 901. ولكن بسبب مشاكل قانونية مع Peugeot يلّي أثبتت إنّا بتملك حق تسمية سيارات مع الرقم صفر بالوسط، قرّرت Porsche تغيير الإسم ل 911 إعتباراً من سنة 1965. وبهالفترة كانت مواصفات Porsche 911 متفَوّقة كتير بعالم صناعة السيارات.
والنسخة يلّي عم نُشوفا، ويلّي هِيّي Porsche 911 مَصنوعة سنة 1965 وبتتميّز بتعديلات مِخصّصة للسباقات. اللون الخارجي فُضّي، والخطوط بترمز طبعاً للشخصيّة الأصليّة من Porsche ويلّي دخلت عقلوب الناس مع الوقت.
ومن الداخل، عَم نشوف لون أسود مميّز، مع Bucket Racing Seat يَعني مَقاعد مأخودة من سيارات السبق، بتتمتّع بشكل رياضي وبجوانب نافرة لتثبيت أجسام الركاب.
ميكانيكياً، المحرك بيتكوّن من ست أسطوانات بوضعيّة معروفة بإسم Boxer، يعني ال Cylinders 6 مِسَطّحين ومِش V، مع ست Solex Carburetors، بأمّنو فعاليّة عالية بالرغم من الإستهلاك المِرتفع للبنزين. ومع هال Flat 6 Engine بسعة ليترين، بتبلغ القُوّة 128 حصان عند 6100 دورة بالدقيقة، مع عزم أو Torque بيوصل لحدود 175 "نيوتن متر" إعتباراً من سرعة دوران متوسّطة لل Engine بتبلغ 4200 دورة بالدقيقة. وبتتولّى Transmission يدويّة من خمس نسب أماميّة، نقل القوّة المُستخرجة من المحرك للإطارات الأمامية.
وبالنسبة للأداء، من الممكن التسارع ب Porsche 911 2.0L يلّي بيبلغ وزنا 1080 كيلوغرام بسّ، خلال 9 ثوان. وهالرقم كان مميّز، باعتبار إنّو عم نحكي عن Performance تِسجّلت من حوالى 50 سنة. والسرعة القصوى أو ال Top Speed بتبلغ 220 كيلومتر بالساعة.
وتميّزت هالسيارة الرياضية ضمن فئة Coupe بعصبيّتا على الطريق، مع ميل للإنزلاق جانبياً من الجهة الأماميّة داخل المُنعطفات أو ال Corners. وهالشي بيستَوجب إنّو يِتمتّع السايق بمهارات قويّة للسيطرة على التوازن العام. ولكن وبفضل Suspensions كتير متطوّرين مقارنة بيلّي كان متوفّر بغير سيارات سنة 1965، تمتّعت Porsche 911 بديناميكيّة عالية على الطريق. وكانت تأمّن متعة قيادة عالية ورا ال Steering، خاصة بالنسبة للسايقين يلّي بحبّوا القيادة السريعة والإستعراضيّة.
وبالختام، وإذا كانت Porsche 911 ، ومع محرك بسعة 2,0 ليتر، أثبتت تفوّقا ونجاحا بمواجهة كل المنافسين سنة 1965، الأكيد إنّو قيمتا اليوم كسيارة كلاسيكية بعد مرور خمسين سنة على إطلاقا، ما بتتقدّر بتمن، وبتمثّل حلم لكل شخص بحبّ ال Sport Collection Cars.