مجموعة GMC Yukon منوّعة وبتضمّ إضافة للفئة Yukon القياسية، Yukon XL يلّي بتستفيد من طول إضافي مع مساحات أكبر للركاب وبصندوق التحميل، وYukon Denali يلّي بتستفيد من مزيد من التمايز ومن تجهيزات الفخامة. وهيّي بتنتمي كِلّا لفئة Full-size SUV يعني سيارات الدفع الرباعي الكبيرة الحجم. وبتتميّز إضافة لإمكانيّة نقل بحدود تسع ركّاب داخل ال Cabin ببعض الفئات، بمستوى فخامة عالي، وبقوّة كبيرة على الطريق.
ومن سنة 1992، وكبديل ل GMC Jimmy، بدأت رحلة Yukon الناجحة ضمن سيارات SUV الأميركانية الأصليّة، والمرغوبة كتير بمنطقتنا بفضل قدراتا وعملانيّتا الكبيرة. وبعد تقديم أجيال جديدة سنة 2000، وسنة 2007 كمان، قرّرت GMC إنّو الوقت صار مناسب لإطلاق جيل جديد كلياً لسنة 2015.
تصميمياً، الخطوط الخارجية صارت أكتر إنسيابية من السابق، وأكتر ديناميكيّة كمان. ومع إنّو تمّ الإحتفاظ بشخصيّة Yukon الكلاسيكية المعروفة، فينا نلاحظ لمسات جمالية مختلفة، وطابع عصري محسّن. ومن بين المواصفات اللافتة للنظر، شبكة تهوية أو Grill كبيرة مع خطوط مصنوعة من ال Chrome، وإضاءة LED جذابة، وإطارات بقياسات بتتراوح بين 18 و22 "إنش". وبشكل عام، بعدو Yukon بيفرض حضورو على الطريق، مع إستفادت الجيل الجديد منّو من طلّة أجمل من السابق و Modern أكتر.
وبالنسبة لأبرز التحسينات يلّي لحقت بمقصورة Yukon لسنة 2015، زيادة المساحات الداخلية للصف التاني من المقاعد بمقدار 5 سنتيمترات، وتطوير نظام طيّ المقاعد الوسطيّة والخلفيّة يلّي من الممكن تصير مسطّحة كلياً بأرض ال Cabin، لتفعيل قدرات التحميل. ومن ضمن التجهيزات المهضومة، مراية مثبّتة فوق الكونسول الوسطي، بتوفّر رؤية بانورامية للمقاعد الخلفيّة، وبتسمح بتواصل السايق مع الركاب بالجهة الخلفية.
وتمّ إستخدام شاشات عرض ملوّنة بتشتغل باللمس، مع نظام التواصل الرقمي IntelliLink، وإمكان الإستفادة من نظام ملاحة أو Navigation System متطوّر. ومنلاحظ وجود مجموعة كبيرة من الوصلات الإلكترونية، لتشغيل USB و SD Card، مع إمكان الإستفادة من مخرج طاقة بقوّة 220 "فولت". والفئة XL بتستفيد من DVD بيشتغل بتقنية Blu-ray النقيّة كتير، بينما الفئة Denali مزوّدة بشاشة عرض مميّزة أكتر، وبعتبات جانبية مع إضاءة، وبغيرا من مواصفات الفخامة. ومن ضمن التجهيزات المشتركة، مكيّف كتير فعّال، ونظام موسيقى من تطوير Bose.
ومنذكّر إنّو من بين أهمّ الفوارق بين Yukon والفئة XL منّا، قاعدة سفلية أو Wheelbase أطول بمقدار 35 سنتيمتر، بتترافق مع طول إجمالي إضافي بزيد بمقدار 50 سنتيمتر. وهالشي إنعكس بشكل إيجابي على مستوى راحة الجلوس، والمساحات الداخلية المخصّصة للركاب، خاصة على مستوى الأرجل بالجهة الخلفيّة. أكتر من هيك، Yukon XL بتوفّر قدرات تحميل أكبر من يلّي بتوفّرا GMC Yukon العادية، علماً إنّو جيوب التخزين داخل ال Cabin كتيرة ومنوّعة، وبعضا مخصّص لل "كومبيوتر" أو ال iPad. وعلى مستوى السلامة، أضاف المهندسين وسادة هوا وسطية ليصير عدد ال Airbags الأمامية تلاتة.
ميكانيكياً، بتستفيد مجموعة GMC Yukon لسنة 2015، من محركات جديدة من فئة EcoTec3 يلّي كان تمّ تدشينا بالماضي القريب مع GMC Sierra. وبينما بتبلغ سعة ال V8 Engine المتطوّر 5,3 ليترات بالفئتين Yukon و Yukon XL وبولّد 355 حصان، بتبلغ 6,2 ليتر بالفئة Denali بقوّة بتوصل ل 420 حصان، ول 624 "نيوتن متر" من العزم أو ال Torque. ولخفض إستهلاك البنزين، بتستفيد هالمحركات من أنظمة مختلفة، أبرزا نظام وقف عمل نصف الأسطوانات أوتوماتيكياً بس ما يكون في ضرورة لكامل طاقة ال Engine. وما مننسى ال Gearbox الأوتوماتيكية من ست نسب ويلّي بتنقل القوّة لنظام دفع بالإطارات الأربعة، بتحكم إلكتروني.
وترافق هالشي مع تطوير بنية الهيكل أو ال Chassis، وتحسين فعالية نظام التعليق أو ال Suspensions، بشكل عزّز التوازن العام على الطريق، وزاد من قدرات التحمّل بنفس الوقت. ومع الفئة Denali من الممكن الإستفادة من تحكم إلكتروني بحركة ال Suspensions لمزيد من الفعالية. ومنذكّر إنّو Yukon بيستفيد من قدرة تحمّل كبيرة على الطرقات الوعرة، بفضل ال Chassis المستقل عن جسم السيارة أو ال Body.
والتجهيزات الإلكترونية كتيرة، وبتشمل مجموعة واسعة من الأنظمة المُخصّصة لمساعدة السايق على تجنّب الحوادث، متل نظام التنبيه من خطر إصطدام أمامي، ومن خطر الإنحراف الجانبي، ومن مرور سيارات ورا Yukon خلال الرجوع إلى الخلف. وفي حال تثبيت سرعة السير عبر نظام ال Cruise Control، بيتولّى رادار بالجهة الأمامية تحديد المسافة الآمنة مع السيارات السابقة، لتخفيف السرعة تلقائياً بس يكون في ضرورة لهالشي.
والأداء كتير قوي، مع قدرة Yukon Denali مثلاً على التسارع من صفر لمية كيلومتر بالساعة خلال 6 ثوان، علماً إنّو قوّة السحب والجرّ بتوصل لأكتر من 3 Tons ونصّ.
وثبات Yukon مكفول بفضل نظام ال StabilityTrak، مع محور خلفي أو Rear Axle أعرض من السابق، وتحكم إلكتروني بال Differential. وأعمال التطوير والتحسين طالت المكابح يلّي بتستفيد من أسطوانات Duralife، مع إستخدام نظام توجيه إلكتروني جديد.