Essen Motor Show : معرض ألماني مشهور مركّز على السيارات المعدّلة

11 أيلول ، 2014 12:09 م
Essen Motor Show : معرض ألماني مشهور مركّز على السيارات المعدّلة
Advertisement

Essen Motor Show هو معرض ألماني مشهور، كان متخصّص بالسابق بالسيارات الرياضية الجديدة. ومع الوقت بلّش هالمعرض يتغيّر تدريجياً، نتيجة تغيير بمتطلّبات الزوّار. وصار إهتمام المعرض مركّز على السيارات المعدّلة، أكتر من السيارات الرياضيّة الجديدة وقطع الغيار. وبهدف الحفاظ عل تنوّع المعروضات ب Essen، بيبتكر المنظّمين كل سنة أفكار جديدة. والدورة الأخيرة يلّي تنظّمت من أسابيع قليلة، إتضمّنت مواضيع مختلفة، للحفاظ على الإهتمام برياضة السيارات، متل إحياء ذكرى مية سنة على "رالي مونتي كارلو"، وعلى سباقات "Indy 500"، ومتل إستعراض الجيل القادم من سيارات سباقات DTM.

وإلى جانب عدد من السيارات الرياضية، وكتير من السيارات المعدّلة أو Tuned، وكمان بعض السيارات الكلاسيكيّة، ما خلي المعرض من السيارات الكهربائية، ومن العروض الغريبة، وكمان من مجموعة من الأكسسوارات وقطع الغيار. وخلال الدورة 44 من هالمعرض المشهور، شارك أكتر من 1200 عارض من 30 دولة، توزّعوا على 17 قاعة، علماً إنّو المعروضات إمتدّت على مساحة 111.000 متر مربّع. أما الزوّار فبلغ عددن 337 ألف شخص، توافدوا من أكتر من 40 بلد، خاصة من الدول الأوروبية.   

 Brabus شركة التعديل الغنيّة عن التعريف، ركّزت بتعديلاتا على Mercedes M Class الجديدة. وعرضت Package كاملة من ال Accessories الخاصة بتفعيل الشكل الرياضي الهجومي، وبتعزيز ال Aerodynamics. وطالت التعديلات المحرك، بالتزامن مع خفض إرتفاع ال Suspensions، وإستخدام مكابح ضخمة، مع Wheels بقياس ممكن يوصل ل 22 إنش.

وتعديلات Brabus ل Mercedes طالت كمان SLS Roadster يلّي صارت بإسم Brabus SLS 700 Biturbo، مع محرّك بقوّة 700 حصان، وTorque بقوّة 850 "نيوتن متر". والتعديلات طالت ال Suspension يلّي صارت بتحكم إلكتروني. وبتبرز ال Wheels قياس 21 إنش بالأمام، و22 إنش بالخلف، ومجموعة من المكوّنات أو ال Components الخاصة بتفعيل الإنسيابية. ومن الممكن الوصول لسرعة 340 كلم/س.     

 شركة التعديل الألمانية Sievers قدّمت McLaren SLR 722 GTB بمحرك معدّل أقوى بكتير من النسخة العادية، وبطاقة إجمالية بلغت 814 حصان، مع Torque بلغ 1200 "نيوتن متر"، علماً إنّو وزن السيارة ما بيتجاوز 1500 كيلوغرام. وليلّي عجبتو هالسيارة، المطلوب 1,19 مليون Euro بس، لشرايتا!

Lorinser عرضت من جهتا Mercedes Benz CLS بمواصفات معدّلة، متل ال Wheel قياس 20 إنش والمصنوعة من ال Alloy الخفيف الوزن، ومتل ال Spoilers الكبار والعراض، ومتل ال Skirts أو الشفرات الجانبية. والهف تعزيز الإنسياية، وتفعيل الشكل الرياضي.

أما Wimmer RS فهيّ عدّلت Mercedes C63 AMG يلّي صار إسما BlueGreen، وتمايزا بيتركّز على ال Body المزيّن بألوان وبرسومات أنيقة.

ومن ABT Sportsline تمّ عرض نسخة معدّلة من سيارات Audi، وهيّي R8 V10 Spyder GTS يلّي بتستفيد من محرك V10 سعة 5,2 ليتر، إرتفعت قوّتو ل 620 حصان. وتزامن هالشي مع تعديلات لل Suspensions وال Brakes وغيرا. والأهم إنّو السيارة المكشوفة، بتستفيد من Body مزيّن بكل الألوان والرسومات المميّزة.

والإهتمام ب Audi R8 كان من شركة TC Concepts كمان، يلّي عرضت من جهتا R8 Toxique بمواصفات لافتة، متل Rear Wing أو جناح خلفي، وLed Lights، وExhaust مصنوع من ال Stainless Steel. وبالداخل ال Carbon Fiber بغطّي لوحة القيادة أو ال Dashboard، والمقاعد أو ال Seats، والمقود أو ال Steering Wheel، وال Door Panels

AC Schnitzer عرضت بدورها تلات نسخات معدّلة من سيارات BMW ، مبنيّة على 6 Series، وعلى 1 Series بفئتا العادية و  M Coupe.  بالنسبة للفئة السادسة المعدّلة، فطاقة محركا إرتفعت من 407 ل 540 حصان. ومحرك V8 المذكور قادر يرفع السرعة من صفر ل مية كيلومتر بالساعة خلال 4,3 ثوان. أما مع الفئة الأولى فالتحسينات تركّزت على المستوى البصريّ، أو ال Visual Enhancements. وطالت كمان المحرك يلّي إرتفعت طاقتو من 340 ل 400 حصان. 

وإنطلاقاً من Porsche 911 Carrera S الجديدة، قدّمت شركة SpeedArt النسخة المعدّلة SP91-R يلّي بتتميّز بإنسيابية معزّزة، وبتعديلات تصميميّة خارجية لمزيد من الجاذبية الرياضية، وأخرى داخلية لمزيد من الفخامة، خاصة مع جلد Alcantara. والأهم إنّو طاقة المحرك إرتفعت ل 435 حصان، وال Suspensions إستفادت من برمجة مخصّصة لسيارات السباق.

وعرضت SpeedArt كمان BTR-2 600 Evo المطوّرة من 911 Turbo Convertible، علماً إنّو أحرف BTR بترمز لعبارة Bi Turbo Racer. وسيارة السباق المزوّدة بمحرك مع Turbo مزدوج، بقوّة 600 حصان، بتستفيد من Evolution Body Kit

وإنطلاقاً من Porsche Cayenne قدّمت شركة التعديل الألمانية Hofele سيارة بإسم Hofele Cayster GT 670، إرتفعت قوّة محرّكا V6 TDI من 245 إلى 315 حصان، وال Torque من 580 إلى 737  "نيوتن متر". وبس توصل هالسيارة لسرعة 80 كلم/س. بتوطا ال Suspensions بمقدار أربع سنتيمترات، لتعزيز التوازن.

سيارات Porsche المعدّلة ضمّت كمان Panamera Turbo المحسّنة من قبل شركة TechArt ويلّي صارت قوّة محركا بتبلغ 700 حصان، وعزم دورانا بيبلغ 880 "نيوتن متر".

وشركة 9ff للتعديل قدّمت من جهتا GT9 – CS، المطوّرة إنطلاقاً من 911 Porsche العادية، علماً إنّو CS هيّي إختصار لعبارة Club Sports. وهالسيارة مخصّصة لحلبات السباق، وكل التعديلات يلّي لحقت فيا صبّت بهالإطار. ومع وزن بيبلغ 1240 كيلوغرام، بفضل Body مصنوع من الكربون، كان بالإمكان الوصول لسرعة قصوى بتبلغ 409 كلم/س. وهالشي إطلب إعتماد مكوّنات متطوّرة خاصة بتحسين ال Aerodyamic، وكمان Brakes مصنوعة من السيراميك، بشكل بيسمح بتخفيف السرعة من 300 كلم/س. لصفر خلال 7 ثوان بسّ! إشارة إنّو المحرك المعتمد هوّ V6 سعة 3,6 ليترات، مع Turbo مزدوج، بقوّة 750 حصان، وبعزم دوران بيبلغ 910 "نيوتن متر".

وشركة AC Schnitzler تواجدت بالمعرض عبر BMW 650i Cabrio، يلّي تمّ رفع قوّة محرّكا من 340 ل 400 حصان، وزيادة شكلا الرياضي، عبر Wheels مجوّفة، وExhaust System مصنوع من التيتانيوم، وغيرا.

 وبالرغم من سيطرة السيارات الألمانية الكاملة على منصّات Essen Motor Show، تمّ عرض بعض السيارات من الخارج، منّا الجيل الخامس من Chevrolet Camaro SS من تعديل Geiger Cars، يلّي أضافت لإلا إسم Blaumatt Gold، بإشارة لألوانا الجديدة. وبتبرز ال Wheels قياس 22 إنش، وال Exhaust System الجديد، واللون الأسود داخل ال Cockpit. ومن خلال التعديلات يلّي طالت محرك V8 سعة 6,2 ليتر، إرتفعت القوّة الحصانية من 422 ل 500 حصان.

ولمحبّي سيارات SUV بكامل فروعا، برز Range Rover Evoque بفئة من تلات أبواب، ومن تعديل Startech. وبهالإطار تم تغيير الواجهة الأمامية، وال Diffuser وال Exhaust بالخلف. وتم كمان إعتماد Wheels قياس 21 إنش، وSuspensions رياضية بالتزامن مع تخفيض الإرتفاع أو ال Ride Height بمقدار 35 ميلليمتر.

 وإلى جانب السيارات المعدّلة من قبل الشركات المتخصّصة بالتعديل، كان لافت قيام عدد من الصانعين بتقديم طرازات معدّلة من الشركة المُنتِجة نفسا. وبهالإطار، عرضت BMW مجموعة كبيرة من سياراتا، تحت إسم Performance، ضمّت 1 Series، و3 Series، X5، و X6، والفئات M منها.

 ومن ضمن السيارات المعدّلة المميّزة، Fabia RS 2000 من إنتاج Skoda

والتمايز اللافت شمل Lamborghini Gallardo Superleggera مع Brake Calipers مزوّدة بإضاءة Led!

ومن ضمن عروض Essen Motor Show المميّزة، مسابقة تعديل بإسم Utimate Tuner ، شارك فيا تلات مرشّحين نهائيّين، إختيروا للمسابقة. وهنّي جابوا سياراتن العادية من إنتاج BMW وAudi وSeat. وإشتغلوا عليا لمدة 10 إيام، علماً إنّو إدارة المعرض قدّمتلن قطع الغيار. وقام بتوزيع الجايزة على الرابح، Eddie Paul يلّي كان ورا تصميم سيارات فريدة من نوعا لأفلام Hollywood، متل The fast and the furious وBack to the future.

 بالعودة لمعرض Essen الألماني، تميّزت الدورة الأخيرة منّو، بسيارات لافتة للنظر، ومنّا بعض الطرازات الغريبة! ومن هالسيارات:

Bamboo الكهربائية من تطوير شركة Rinspeed ويلّي هيّي عبارة عن سيارة مخصّصة للترفيه، وخاصة على شاطئ البحر. وهي بتشبه سيارات Buggy، وبتستفيد من نظام دفع كهربائي غير ملوّث للبيئة. وبتضم هالسيارة درّاجة هوائية أو Bicycle يمكن طيّا وتوضيبا بسهولة. والأهم إنّو السقف مصنوع بجزء كبير منّو من الخيزران، أو ال Bamboo، وبيصلح ليكون Beach Mat أو حصيرة للشاطئ.

Road Funfair وهيّي سيارة من تصميم الأميركي Tom Wright يلّي أطلق عليها لقب Bumper Car، وجعلا صالحة لطرقات ال Asphalt بعد تحويلا من الدفع الكهربائي للدفع الحراري، من خلال محرك Kawasaki من أربع أسطوانات.

Royal Dragster هيّي منّا سيارة Drag بالمفهوم التقليدي، لكنّا عبارة عن طراز العام 1974 من Rolls Royce تمّ تعديلا لتتمتّع بقدرات خارقة على الطريق. ويمكن مثلاً عبور مسافة 400 متر بسبع ثوان، والوصول إلى سرعة قصوى بتبلغ 320 كلم/س. وبيتميّز المحرك بإنّو بيمشي على البنزين بلا رصاص، أو بوقود ال Menthanol، مع طاقة عالية.

Hemi Trike Rocket 2 هيّ عبارة عن صاروخ بالشكل وبالمضمون. ال Body مصنوع من الألومنيوم، والأداء خارق مع سرعة قصوى بتبلغ 320 كلم/س. وللكبح من الضروري إستخدام Parachute !

ومن السيارات الغريبة مننتقل للسيارات المتفوّقة والمميّزة بمجال محدّد، وأبرزها:

Peugeot EX1 يلّي كانت أسرع سيارة كهربائة داخل المعرض. وهيّي قادرة على التسارع من صفر لمية كيلومتر بالساعة بتلات ثوان و49 جزء من الثانية بسّ. وشكلا إنسيابي، علماً إنّا منخفضة كتير على الطريق لضرورات التوازن.

ولرجال الشرطة حصّتن من السيارات المعدّلة، متل هال Audi R8 GT R يلّي بتتمتّع بقدرات مميّزة، متل السرعة العالية الضرورية للمطاردة، ومتل المتانة وغيرا. وهالسيارة المركّبة من قبل أكتر من شركة تعديل، بتتميّز بمحرك V10 بقوّة 620 حصان. وهي بتتسارع من صفر لمية كيلومتر ب 3,2 ثانية، وبتوصل لسرعة 325 كلم/س.

أما السيارة الأخف وزناً في معرض Essen للسيارات، فكانت من تطوير Franco Sbarro وبتوزن 500 كيلوغرام. ومن ضمن مميّزاتا عجلات أو Wheels مصنوعة من ال Polycarbonate.

بالنسبة للسيارة الأقوى بالمعرض، فهيّ إستفادت من محرك طيّارة، سعة 27 ليتر! وهالمحرك V12 مع ضاغط هوا مزدوج مصنوع من قبل شركة Rolls Royce وهوّي بقوّة 3000 حصان. وتمّ أخدو من طيارة Merlin وإعتمادو بسيارة Chevrolet قديمة، بهدف الإستعراض.

وشركة Cartronic Motorsport عرضت نسخة من Porsche بتتميّز بهدير دوران صاخب، إحياء لصوت محركات Porsche الأسطوري.

 وضم معرض Essen للسيارات، مجموعة من السيارات الكلاسيكية العريقة، ويلّي كانت مخصّصة للبيع لصالح محبّي سيارات Vintage، والمستعدين لدفع مبالغ كبيرة لضمّا لمجموعة سياراتن الكلاسيكية النادرة.

والسيارات الغالية بالمعرض تمثّلت خاصة بسيارتين كلاسيكيتين: Mercedes W196 مع كفالة بقيمة عشر ملايين Euro، وكمان Ferrari 860 Monza بكفالة بقيمة سبع ملايين Euro.

وللمرّة الأولى شاركت سيارات Off Road بالمعرض. ومنّا مثلاً Volkswagen Race Touareg 2 يلّي بتشارك برالي Dakar، وFord Ranger Pick Up المخصّصة للطرقات الوعرة، وغيرا.

وكمان سيارات Hotrods وAmerican Muscle Cars شاركت بدورا بالمعرض.

 أما Hall 4، أو القاعة الرابعة بمعرض Essen، فكانت مخصّصة للدراجات، منّا كهربائي، ومنّا غريب الشكل والمضمون! وعرض فريق ميونخ للسباقات ، ويلّي كان ربح أربع بطولات للدراجات الكهربائية، دراجة Fim e-Power المشهورة ضمن فئتا.

 وعلى المستوى الرياضي داخل Essen Motor Show برزت منصّة إحياء ذكرى مية سنة على إنطلاق رالي Monte Carlo الدولي. ومن ضمن السيارات القديمة المعروضة، AC Six Sport يلّي فازت بالسباق سنة 1926، بقيادة السايق Victor Austin Bruce. ومن السيارات الجديدة الخاصة بهالسباق Citroen Xara WRC الخاصة بالسايق Sebastien Loeb، وPeuget 207 S2000، بقيادة Bryan Bouffier.

وإحياء ذكرى مية سنة على سباق Indy 500 تمّ من خلال مجموعة كبيرة من السيارات الفايزة، منّا Mercedes منتجة سنة 1923، وPenske PC – 7. وبقطاع ال Formula One برزت Mercedes Benz W196، وMaserati 250 F مزوّدة بمحرك V12، طبعاً، قبل ما تصدر القوانين الجديدة الخاصة بمحركات ال F1.

وبهدف جعل منصّات الرياضة الميكانيكية غنيّة أكتر بالعروضات، كان تركيز كبير على الدورة المقبلة من سباقات الفئة DTM، علماً إنّو هالأحرف هي خاصة بعبارة Deutche Tourenwagen Masters. ولأنّو التغيير بالقوانين الخاصة بسباقات DTM كبير لموسم العام 2012، السيارات المشاركة كلّا جديدة. والمنافسة الشرسة بين Audi وMercedes Benz رح تتعزّز مع عودة BMW للسباق، للمرّة الأولى من مطلع التسعينات. إشارة إنّو بطولة السيارات السياحية الألمانية DTM كانت متواجدة بقوّة بالمعرض، وتحديداً بالقاعة التالتة بكاملا. وبطل سباقات DTM،  Martin Tomczyk، كان حاضر بالمعرض.

 والعروض ب Essen Motor Show تميّزت كمان بتبادل للمحركات. وبهالإطار كان من الممكن مشاهدة Dodge Charger مصنوعة سنة 1965، ومزوّدة بمحرك Charger جديد من إنتاج 2010. أو محرك كبير معتمد بسيارة صغيرة.

والتبادل بالقطع ما إقتصر على المحركات، بل شمل كتير من المكونات الأخرى، وكان مثلاً من الممكن مشاهدة مرايا أو عجلات مأخودة من سيارة معيّنة، ومستخدمة بسيارة مختلفة لمزيد من التمايز. وشركة Aerotechnick أتاحت الفرصة لترك الإمضاء الشخصي على ال Wheels.

والمعروضات في Essen Motor Show شملت أكسسوارات مختلفة، منّا قطع غيار، وقطع تعديل، ومعدّات خاصة بسيارات السباق، وحتى سيارات سباق كاملة معروضة للبيع!

 وهيك بتخلص جولتنا على منصات معرض Essen الألماني، يلّي هوّي معرض بضوّي خصوصاً على كل الصانعين يلّي بيحوّلو سياراتنا لتحف فنّية، وبخللُوا تصير أقوى وأسرع، إلى جانب كل معروضاتو الغنيّة والمنوّعة. وكل الأمل إنّو تكونوا إسمتعتوا بهالجولة... باي!

   

 

Advertisement
/
Advertisement
QUICK CAR FINDER
find car
find car
2024 Brabus 900 Superblack
From Brabus
28 March 2024, 10:20 PM
View All
Wheel

What would you like to drive?

Who knows? Maybe MotorShow can help
submit
submit
Advertisement
مقارنة بين هينيسي فينوم 800 سوبر تشارج فورد أف150 وجيب جراند شيروكي تراك هوك
MotorShow
MotorShow
مقارنة بين هينيسي فينوم 800 سوبر تشارج فورد أف150 وجيب جراند شيروكي تراك هوك
مقارنة بين هينيسي فينوم 800 سوبر تشارج فورد أف150 وجيب جراند شيروكي تراك هوك
arrow up
Back to top
close
Follow us
MotorShow Middle East: We test-drive all types of cars and vehicles from all over the world and review about motoring technology for the Middle-East. At MotorShow.me you’ll find thousands of Photos and Videos covering the Automotive Industry, ranging from New Models, Super Cars, Motorcycles, Classics, to Formula 1, in addition to Boats, Planes, Hi-Tech and Road Safety, all of it brought to you by Automotive Engineer and Film Director Nadim Mehanna and his specialized MotorShow Team.
show site map
NMPRO all rights reserved – COPYRIGHT 2024 NMPro
SITEMAP