سنة 2013 رَجّعِت Rolls Royce الحياة لإسم Wraith العريق، عبر تقديما Coupeبتحمل هالإسم، فخمة متل العادة، ولكن كمان كتير قويّة. وتوفّرت Rolls Royce Wraith بالسنوات الماضية بالعديد من الفئات المختلفة والمميّزة، لتنضم لإلا اليوم فئة جديدة بإسم Black Badge، يلّي متل ما إسما بدلّ، بتستفيد من لون أسود بغطّي كتير من مُكوّناتا. والهدف من هالفئة الجديدة مش بسّ لفت النظر على صعيد الشكل الفريد من نوعو، ولكن تأكيد قدرة Rolls Royce على إنتاج سيارات رياضية وديناميكيّة بكل ما للكلمة من معنى، مع الإحتفاظ بمختلف مواصفات الفخامة والترف المِعتادة. وبالتالي الهدف الفعلي هوّي جذب فئة جديدة من المُستهلكين لصالات عرض هالشركة البريطانية العريقة، من دون التأثير سلبًا على زباينا الأوفيا. وهون من الضروري الإشارة إنّو معدّل عمُر زباين Rolls Royce إنخفض من 55 سنة بالسابق، ل 43 سنة حاليًا، بظلّ وجود خطط لخفض هالمعدّل أكتر وأكتر.
التصميم الخارجي ل Wraith Black Badge ما بيختلف عن الشكل المعهود ل Wraith العادية، ولكنّ مع إهتمام كبير ببعض التفاصيل الدقيقة. ومتلاً وإضافة للون الطلاء أو ال Paint الأسود يلّي يُعتبر كتير غميق ومِعتم بشكل مميّز ضمن عالم صناعة السيارات، تم إستخدام قطع كروميّة بلون داكن كمان على مُستوى الواجهة الأماميّة وجوانب فتحات الهوا، مع تعتيم شعار الشركة المعروف بإسم ال Flying Lady، وال Exhaust، وغيرا من المُكوّنات. والتمايز التصميمي الأبرز بيتمثّل بالإطارات الخاصة بالفئة Black Badge، ويلّي بتتميّز بطبقاتا المتعدّدة من الألومنيوم والكربون المِرَكّب، إضافة طبعًا لشكلا الديناميكي. وبالنسبة لإطارات الزجاج الجانبي المصنوعة من الكروم، فهيّي بقيت من دون تعديل، وتِغييرا بتمّ بسّ عند الطلب.
وبالإنتقال لمقصورة Rolls Royce Wraith Black Badgeاللون الأسود حاضر بقوّة متل بالخارج، مع بروز خيارات مختلفة من ألوان الجلد يلّي بتغطّي المقاعد ومكوّنات داخلية تانية، والكفيلة بتأمين التناقض الحلو والمطلوب مع اللون الأسود الأساسي. ومن بين المُميّزات الداخليّة، ساعة لافتة للنظر، وشعارات مطبوعة على المقاعد.
وبما إنّو الهدف من الفئة Black Badge رفع قُدرات Wraith بشكل واضح، وبالرغم من الإحتفاظ بالطاقة الحصانية القُصوى عند 624 حصان للمحرك المعروف، يعني ال V12 بسعة 6,6 ليترات مع 2 Turbo، تمّ رفع العزم بحوالى 70 "نيوتن متر"، ليبلغ 870 "نيوتن متر". وترافق هالشي مع تطوير ال Transmission الأوتوماتيكيّة. وبمجرّد الضغط على دعسة البنزين بنسبة 25 % أو أعلى، بتحافظ ال Gearbox على نسبة الحركة لفترة أطول، وبتسمح بالوصول لسرعة دوران أعلى بمقدار 500 دورة بالدقيقة للمحرك، بهدف تعزيز الأداء الديناميكي. وبمجرّد الضغط على البنزين بنسبة 80 ل 100 %، ما بتمّ الإنتقال للنسبة الأعلى قبل الوصول لسرعة 6000 دورة بالدقيقة. وفينا نقول إنّو سرعة التجاوب بين المحرك وال Transmission صارت أكبر، والفعاليّة صارت أوضح، مُقارنة بأداء Wraith العادية، خاصة عند إختيار وضعيّة القيادة الرياضية لهالسيارة الكبيرة ويلّي بيبلغ وزنا حوالى 2500 كيلوغرام. وهالشي بيتعزّز أكتر وأكتر، بفضل التعديلات يلّي لحقت بال Suspension يلّي بتشتغل بضغط الهوا، باعتبار إنّو التعامل مع التموّجات والإهتزازات صار يتمّ بسرعة أكبر من السابق، للحفاظ على أعلى ثبات وتماسك مُمكن. ومن بين التعديلات كمان، زيادة فعاليّة المكابح، من خلال زيادة حجم ال Discs.
أكيد إنّو Rolls Royce Wraith Black Badge بتتمتّع بحضور كتير قوي على الطريق، مع هيبة كتير عالية. واللون الأسود من الخارج والداخل بيفرض حالو وبأمّن جاذبيّة لافتة، وكتير من الفرادة والتمايز. وإضافة للهالشي، التحسينات على مُستوى الأداء الديناميكي خلّت طابع الحركة يصير رياضي أكتر من السابق. وبالتالي، مع Wraith Black Badge بيحصل المستهلك على سيارة كتير فخمة وراقية من جهة، وكتير رياضيّة وقويّة من جهة تانية، والأهم من هيك إنّا بتحمل إسم وشعار Rolls Royce وتُعتبر من أقوى سياراتا.