خبرة Chevrolet مع Malibu كتير قويّة، لأنّو إنتاج هال Sedan الناجحة كان بلّش سنة 1964. وبعد توقّف قصير من بعد سنة 1983، رجعت Malibu بقوّة للأسواق إعتبارًا من سنة 1997، وهيّي صارت بجيلا التاسع لجديد كليًا أفضل من السابق على كل المستويات، بدءًا من الهيكل المتين والخفيف، مع قاعدة أطول بتأمّن راحة إضافيّة.   

وبالنسبة للتصميم، وعلى الرغم من الإنتماء نظريًا لفئة Sedan من الحجم المتوسّط، الخطوط كتير رياضيّة وديناميكيّة عمليًا. الواجهة الأماميّة هُجوميّة مع شبكتين أو  2 Grills، بيفصل بينا شعار Chevrolet، ومع عاكس أو Spoiler بيتميّز بفتحات هوا جانبيّة وإضاءة LED للنهار. والخطوط الجانبية المتموّجة، صارت إنسيابيّة أكتر، وقريبة من خطوط السيارات الرياضيّة، مع شبه بطراز Impala. والجزء الخلفي من جسم Malibu منسجم تمامًا مع التصميم الأمامي، وبيستفيد من لمسات عصريّة واضحة كمان.

بالإنتقال لداخل هالChevrolet  العريقة، المساحات المتوفّرة للركاب كتير واسعة، علمًا إنّو المقاعد مريحة وبتوفّر الثبات لأجسام الركاب داخل المنعطفات. وإستفاد الركاب بالخلف من 3 سنتيمترات إضافية على مُستوى طول المساحة الإجماليّة. وبتتمتّع المقصورة بالفخامة على مُستوى المكوّنات، مع لوحة قيادة كتير عصرية وجذابة، ومع تجهيزات كتير متطوّرة وعملانية. ومتطلبات السلامة مؤمّنة بالكامل، وأبرزا  Airbags10.   

ومنذكر إنّو خيارات التجهيزات بتختلف حسب الفئة، من L مرورًا ب LS و LT وُصولاً ل Premier الأكتر فخامة. ولكن حتى الفئة القياسيّة مزوّدة بمجموعة كبيرة من التجهيزات الفخمة، ومن بينا مثلاً نظام OnStar من Chevrolet وتقنيّة Bluetooth للتواصل لاسلكيًا بالهاتف المحمول. وطبعًا تجهيزات الفئة الأفخم بتستحقّ التنويه، وهيّي بتتضمّن مقاعد مبرّدة داخليًا مع تحكم كهربائي كامل بالوضعيّة، وأفضل أنظمة الإستماع الموسيقي وتبريد المقصورة، وأحدث شاشات العرض يلّي بتشتغل باللمس مع نظام MyLink، وكتير من مخارج الطاقة الكهربائية ومن منافذ التواصل الرقمي متل USB وغيرا. وكمان نظام شحن لبطارية الهاتف لاسلكيًا، وغيرا من تجهيزات الترف.

ومن بين أبرز مميّزات Chevrolet Malibu لجديدة، قوّة دفع كتير عالية مِأمّنة من خلال محركات صغيرة وإقتصادية، ومش من 6 أو 8 أسطوانات أو Cylinders. يعني عم نحكي عن 250 حصان، وهي قوّة دفع كبيرة لسيارة بيبلغ وزنا أقلّ من 1500 كيلوغرام، متوفّرة عبر محرك Ecotec من أربع أسطوانات بسعة ليترين بسّ. والفضل للقوّة الحصانية العالية بيرجع ل Turbo كتير فعّال، إضافة لنظام بخّ مباشر للوقود، ولتحكم إلكتروني بعمل الصمامات.

وخيارات المحركات بتشمل محرك Ecotec تاني، بسعة 1,5 ليترات بولّد 160 حصان، بيبلغ معدّل إستهلاكو للبنزين 6,5 ليترات لكل مية كيلومتر بسّ. وببعض الأسواق، بتتوفّر Malibu بمحرك سعة 2,5 ليترات، وكمان بمحرك هجين Hybrid بسعة 1,8 ليترات.   

وإضافة لتطوّر هالمحركات المزوّدة بتكنولوجيا Stop – Start يلّي بتوقّف عمل المحرك أوتوماتيكيًا خلال زحمة السير القويّة أو خلال التوقف على إشارات المرور، وبترجع بتشغّلو تلقائيًا كمان بمجرّد الضغط مُجدّدًا على دوّاسة البنزين، بيبرز دور ال Transmission الأوتوماتيكيّة لجديدة يلّي بتتكوّن من 8 نسب أماميّة، إلى جانب ال Gearbox السابقة من 6 نسب.  

وتطوّر Chevrolet Malibu الجديدة مثبّت من خلال المجموعة لكبيرة من التجهيزات الإلكترونية المتطوّرة المتوفّرة قياسيًا أو إضافيًا. ومن بينا نظام توقّف أوتوماتيكي لمنع حُصول حادث إصطدام، ولتجنّب صدم المُشاة خلال الحركة البطيئة داخل المدن، ونظام تعديل أوتوماتيكي لسرعة السير خلال تشغيل ال Cruise Control. ومن بين التجهيزات كمان، نظام بنبّه السايق لخطر الخروج عن المسار، ونظام التحذير من السيارات يلّي عم تقترب من Malibu بشكل خطر من الجهة الخلفيّة الجانبيّة، إضافة لأنظمة منع الإنزلاق والتحكم الإلكتروني بالثبات والتماسك وغيرا. وهال Sedan الفخمة مزوّدة بكاميرا للرؤية الخلفيّة، وبأجهزة تحسّس قدّام ورا، لتسهيل عمليّة الركن بالأماكن الضيقة.

وبالإنتقال للأداء العام، عم تثبّت Chevrolet من خلال الجيل الأحدث من Malibu إنّو مفهوم قيادة السيارات الأميركيّة تغيّر كليًا، وصرنا عم نحكي عن سيارة خفيفة، وعن حركة رشيقة، وعن تجاوب ديناميكي من المحرك، وعن تحكّم وسيطرة عالية من قبل السايق. وإذا كان التراجع طال مصروف البنزين بشكل لافت، وقُدرة التسارع من صفر لمية كلم/س. يلّي بتبلغ 6,6 ثوان مع المحرك سعة ليترين، فالزيادة طالت مسائل منوّعة وكتير مهمّة، وأبرزا مدى التواصل بين الإطارات الأمامية والمقود، وسرعة التجاوب بين دوّاسة البنزين والمحرك مرورًا بسرعة الإنتقال بين نسب ال Transmission، والثبات على السرعات العالية وداخل المنعطفات، والنَفس الرياضي العام، وخاصة متعة القيادة ككل. 

بالخلاصة، وبشكل مُختصر فينا نقول إنّو Chevrolet Malibu تُعتبر عصرية وجذابة على مُستوى التصميم، ومريحة وفخمة على مُستوى المقصورة. وهيّي كمان ديناميكيّة وإقتصادية على مُستوى الأداء، ومتطوّرة على مُستوى التجهيزات. وأهمّ من كل هالمواصفات والمزايا، سعر مبيعا كتير منافس بفئتا، وبيسمحلا تكون من بين أبرز ال Sedan المتوسّطة الحجم، والعائليّة والشبابيّة بنفس الوقت.