سنة 1992 تمّ إطلاق Jeep Grand Cherokee كخيار أكبر وأفخم وأقوى من Cherokee، ليصير بجيلو الرابع إعتبارًا من سنة 2010 لتاريخ اليوم. وخلال خدمتو توفّر Grand Cherokee بفئات كتيرة ومميّزة، وأكيد إنّوالفئة  Trailhawk لجديدة مِنّو، بتستهدف محبّي القيادة على الطرقات الوعرة والمسارات الصعبة.

وإذا كان Grand Cherokee مشهور بفعاليّتو المهمّة خارج الطرقات المزفّتة، ف Grand Cherokee Trailhawk رفع السقف أكتر وأكتر بهالمجال، ليصير تاني Jeep من بعد Wrangler بالنسبة لفعاليّة وقوّة قدرات العبور على الطرقات الوعرة أو Off Road.

بالنسبة للتصميم، التغييرات محدودة وهيّي بتتركّز على مُستوى زيادة المتانة وتعزيز الحماية لجسم هال SUV ولهيكلو. وتمّ مثلاً إستبدال المكوّنات السفليّة يلّي بتبرق، بمكوّنات بألوان معتمة، بالتزامن مع تغيير الإطارات ومع إستخدام دواليب مخصّصة للطرقات الوعرة. وأكيد إنّو إسم وشعار Trailhawk صار موجود بشكل واضح بأكتر من مكان ضُمن جسم هالفئة الخاصة من Grand Cherokee.

وطالت التغييرات أجزاء مخفيّة، من بينا قضبان لزيادة متانة بنية الهيكل، وألواح حماية تمّ تثبيتا أسفل الهيكل، بهدف حماية بعض التجهيزات الميكانيكيّة من أيّا أضرار مُحتملة خلال عبور المسارات الوعرة. وعواكس الهوا تعدّلت كمان لتعزيز قدرات هال SUV على تخطّي المعوقات الطبيعية، متل الصخور والحجار وغيرا. وصارت زاوية الدخول بتبلغ 29,8 درجات، وزاوية الخروج بتبلغ 22,8 درجات. وفي حال الإستفادة من أعلى وضعيّة مُمكنة لمكوّنات ال Suspension، بيستفيد السايق من Ground Clearance بيبلغ274 ملم. وهالشي كتير مهمّ لتجاوز المسارات الصعبة بكل ثقة وفعاليّة.

وبالإنتقال لمقصورة Jeep Grand Cherokee Trailhawk التغيير الأوضح بيتمثّل بإضافة مقاعد SRT الرياضيّة، ضُمن مكوّنات بيطغى عليا اللون الأسود، إضافة لمواد سويديّة وجلد بنوعيّة جيّدة مع خياطة باللون الأحمر لتأمين تناقض تصميمي جذاب. وبموازاة نظام الترفيه السمعي – البصري مع الشاشة الملوّنة ويلّي بتشتغل باللمس قياس 8,4 "إنش"، تم إضافة برمجة خاصة بالمعلومات الضرورية للسايق خلال القيادة على الطرقات الوعرة، متل وضعيّة الدفع يلّي بتناسب طبيعة المسار، ومدى إنضغاط الإطارات، والإرتفاع المتوفّر عن سطح الطريق، وغيرا.

ميكانيكيًا،من المُمكن الإختيار بين محرك Pentastar V6 سعة 3,6 ليترات بولّد 290 حصان، ومحرك Hemi V8 سعة 5,7 ليترات بولّد 370 حصان. ومع المحرك البنزين الأقوى بيُوصل العزم لحدود 570 "نُيوتن متر" بشكل بوفّر قوّة دفع كبيرة، ولكن طبعًا على حساب إرتفاع معدّل إستهلاك البنزين. وبالحالتين، ال Transmission المتوفّرة أوتوماتيكيّة ومن 8 نسب أماميّة، ونظام الدفع بالإطارات الأربعة مع نظام حجز إلكتروني متطوّر بياخد بالإعتبار بشكل دايم ظروف القيادة وطبيعة الطريق.

وبيستفيد Jeep Grand Cherokee Trailhawk لجديد من مجموعة من التجهيزات المخصّصة لتعزيز الأداء خارج الطرقات المزفّتة. وأبرزا بطبيعة الحال نظام الدفع بالإطارات الأربعة، بإسم Quadra-Drive 2 4WD مع Differential خلفي بإنزلاق محدود وبتحكم إلكتروني. وبالتالي، توزيع الطاقة الدافعة بتمّ بشكل كتير مدروس ومتوازن بين الإطارات الأربعة، بحسب مدى تماسك كل إطار لحالو، ودايمًا بيستفيد السايق من عزم كافي لمُتابعة السير، حتى لو كانت تلات إطارات من أصل أربعة عم تنزلق جزئيًا أو كليًا.

 ومتل ما ذكرنا ببداية هالتحقيق، من المُمكن الإستفادة من Suspension بتحكم إلكتروني، مش بسّ لمدى القساوة ولحركة المكوّنات ككل ولنسبة إنضغاطا، ولكن كمان لجهة تعديل الإرتفاع عن سطح الأرض حسب الرغبة. وهال Suspension بتشتغل بضغط الهوامع إمكان رفع الإطارات الأربعة، متل ما إسما بدّل: Quadra-Lift air suspension.

 ومن بين الأنظمة المتطوّرة الخاصة بالقيادة على الطرقات الوعرة، نظام للتحكم بسرعة نزول المُنحدرات من دون تدخّل للسايق على البنزين أو المكابح، بأمّن عبور المنحدرات القاسية بفعالية وأمان ولوّ بسرعة بطيئة، ونظام تاني لمساعدة السايق على الإنطلاق من وسط هضبة قاسية بسلاسة، من خلال منع تراجع ال SUV للخلفخلال الإنتقال من الضغط على المكابح للضغط على البنزين.  

وإضافة لقدرات العبور المميّزة على الطرقات الوعرة، بيتمتّع Jeep Grand Cherokee Trailhawk بأداء نشيط على الطرقات المزفّتة، مع تسارع من صفر لمية كلم/س. خلال 8 ثواني ونصّ مع المحرك V6، وخلال 7 ثواني ونصّ مع المحرك V8، مع إنّو عم نحكي عن SUV بزيد وزنو عن 2 طنّ.

أكيد إنّو Jeep Grand Cherokee Trailhawkرح ياخد موقع مهمّ ضمن خيارات المُستهلكين يلّي بيعطوا أهمّية كبيرة لقدرات العبور على الطرقات الوعرة والمسارات الصعبة، خلال إختيارن ال SUV العملاني والفخم يلّي بناسب رغباتن وميزانيّاتن. ومن الضروري الإشارة إنّو مع Trailhawk كل مزايا Grand Cherokee الناجحة متوفّرة، ومنضاف عليا مجموعة واسعة من المزايا الخاصة بالقيادة خارج الطرقات المزفّتة.