Acadia من ال SUV لجداد نسبيًا، باعتبار إنّو إطلاقو بالأسواق من قبل GMC تمّ سنة 2006، كطراز لعام 2007، علمًا إنّو تشارك الهيكل أو ال Platform مع Chevrolet Traverse ومع Buick Enclave بالسابق، ومع Cadillac XT5 حاليًا. وهال 4x4 الناجح، ويلّي تقدّم بفئة Denali الفخمة كمان، صار بجيلو التاني لجديد كليًا إعتبارًا من سنة 2016، كطراز لعام 2017. وفينا نقول إنّو GMC Acadia 2017 ما بيتشارك مع الجيل السابق غير الإسم!
التغيير الأساسي الأوّل تمثّل بتحوّل Acadia من SUV من الحجم الكبير، ل Cross-over من الحجم المتوسّط. ومن طول بيبلغ 5 متار و10 سنتيمترات، صار الطول الإجمالي ل Acadia 2017 أقلّ بعشرين سنتيمتر، وتحديدًا 5 متار و90 سنتيمتر. وتصغير القياسات الإجمالي طال العرض والإرتفاع كمان. حتى إنّو طول ال Wheelbase تراجع من 3020 ميلليمتر ل 2857 ميلليمتر، يعني أقلّ بحوالى 16 سنتيمتر. وترافقت هالتغييرات الأساسيّة مع عمليّة Diet فعّالة، لجهة التخلّص من الوزن الزايد - إذا فينا نقول، مع خسارة Acadia بجيلو التاني أكتر من 300 كيلوغرام.
بالنسبة للتصميم، التغييرات واضحة على مُستوى الواجهة الأمامية والإضاءة، والخطوط الجانبية يلّي صارت متموّجة أكتر، وخاصة النوافذ يلّي صارت أصغر بالحجم. ومن الجهة الخلفيّة، التعديلات واضحة كمان، مع بروز الإستخدام المكثّف لل Chrome من مختلف الجهات. وبشكل عام، فينا نقول إنّو خطوط Acadia لجديد صارت أقرب لل Crossovers من ال SUVs، مع تعزيز الطابع العصري كمان.
وداخل المقصورة، وبعد ما كان Acadia بجيلو الأوّل مزوّد بتلات صفوف من المقاعد بتساع 8 ركاب طوال، بقي بجيلو التاني مزوّد بتلات صفوف من المقاعد، ولكن تراجعت سعت ال Cabin لسبع ركاب، مع مساحات أقلّ لإلن، خاصة بأقصى الجهة الخلفيّة، نتيجة تقصير القاعدة والطول العام، متل ما سبق وقلنا. ومن بين الخيارات المُمكنة، مقاعد وسطيّة مستقلّة، بتخفّض عدد الركاب لستة، ولكنا بتزيد الرحابة وشعور الإنشراح. من جهة تانية، صار العزل الصوتي داخل المقصورة أكتر فعاليّة من السابق، بالتزامن مع رفع مُستوى الفخامة العامة. وبهالإطار، إشارة إنّو الجلد والخشب والكروم هنّي من المواد يلّي ما بتفارق Acadia، مع إمكان إختيار مقاعد مزوّدة بنظام تهوئة، وأنظمة تحكم كهربائي بكتير من المكوّنات.
ال Dashboard عصريّة ومترفة، ومقسّمة لأجزاء شبه منفصلة لتسهيل الإستخدام، علمًا إنّو المُستهلكين يلّي سبق وساقوا وحدة من سيارات GMC الحديثة ، ما رح يلاقوا صعوبة بالتعامل مع أزرار التحكم. والwheel Steering بيتمتّع بتصميم جذاب، وبمسكات متينة بتساعد على تعزيز التحكم، وبوفّر الوضوح المطلوب لقراءة العدادات الدائريّة لكبيرة. وإضافة لل Navigator ولشاشة العرض المتطوّرة بأعلى الكونسول الوسطي، تمّ توزيع عدد كبير من منافذ USB على مختلف أنحاء المقصورة.
ومن ضُمن التغييرات الأساسيّة كمان مع Acadia بجيلو التاني، إنّو صار يتوفّر بمحرك صغير مع طابع إقتصادي واضح. وببعض الأسواق، المحرك القياسي يلّي بولّد 193 حصان، بيتكوّن من 4 أسطوانات بسعة 2,5 ليترات بسّ، وهالشي بمثّل تطوّر نوعي بالنسبة للمُستهلكين يلّي بفضّلوا يوفّروا بسعر الشراء وبكلفة التشغيل، ولو على حساب بعض التراجع على مُستوى القوة الحصانية والأداء. ولكن أغلبيّة طرازات Acadia لجديدة لسنة 2017، رح تتوفّر بمحرك V6 بسعة 3,6 ليترات، بيستفيد من تكنولوجيا متطوّرة، رفعت طاقتو القصوى ل 310 أحصنة. وفضّلت GMC الإحتفاظ ب Transmission أوتوماتيكيّة من 6 نسب أماميّة، بالرغم من إنّو بعض منافسينا قدّموا Gearbox من 8 وحتى من 9 نسب. ولكن ال Transmission المتوفّرة ب Acadia 2017 بتتمتّع بفعاليّة عاليّة، وبتجاوب سريع، وهي مدروسة للمُساعدة بخفض معدّل إستهلاك البنزين. وتمّ تطوير فعاليّة نظام الدفع بالإطارات الأربعة، لجهة تحسّن سرعة وفعاليّة توزيع العزم بين الإطارات، مع بروز نظام All Terrain Drivetrain يلّي بأمّن تأقلم الدفع والحركة والأداء مع طبيعة الطريق، بغض النظر عن نوعيّة المسار. من جهة تانية، وبالنسبة لقدرات السحب والجرّ فهيّي تراجعت من 2340 كيلوغرام مع الجيل الأوّل، ل 1800 كيلوغرام مع الجيل التاني.
لكن وبغضّ النظر عن هالشي، وبالنسبة للأداء العام، بعدو Acadia قوي ونشيط على الطريق، ولكن رشاقتو على الطريق صارت أوضح مُقارنة بالجيل السابق، بسبب الحجم الأصغر والوزن الأخفّ، والتحكم بالقيادة من قبل السايق صار أسهل، والأداء صار أقرب للسيارات من ال 4X4.
ومن ضُمن المُواصفات الناجحة يلّي حافظ عليا الجيل التاني من Acadia، وحسّنا كمان، مُستوى السلامة والأمان المرتفع المتوفّر للسايق وللركاب. وإضافة لتجهيزات السلامة التقليديّة من هيكل متين، لأحزمة أمان ومساند راس وAirbags، بيتوفّر Acadia 2017 بتجهيزات إلكترونية كتير متطوّرة، متل نظام التحذير من خطر وقوع حادث إصطدام أمامي مع تشغيل تلقائي للمكابح بالحالات الطارئة، ونظام الحفاظ على خط المسار، ونظام كشف السيارات القريبة بشكل خطر من جوانب Acadia، وغيرا من الأنظمة المتطوّرة.
فينا نقول إنّ GMC Acadia صار بجيلو التاني لجديد أصغر وأخف وأنعم، وإنتقل من SUV كبير ل Crossover متوسّط، مع كل الحسنات على مُستوى سلاسة وسهولة القيادة، وكمان على مُستوى إنخفاض إستهلاك البنزين والكلفة العامة، وهالشي من دون ما يُخسر كتير من عملانيّتو السابقة، ولا من قدراتو المهمّة على الطرقات الوعرة. وأكيد إنّو مع Acadia 2017 عم بتحاول GMC تجذب المزيد من الزباين يلّي عم بميلو أكتر وأكتر لسيارات CUV بدلاً من ال SUVs التقليديّة، مع تعزيز إمكانيّة الإستفادة من مُعادلة "النوعية – السعر" بشكل أفضل.