إذا بدنا نوصفT Ferrari GTC4Lusso يلّي هيّي الخَلف الطبيعي ل Ferrari FF، بشكل مُختصر، منقول إنّا سيارة GT أو Grand Tourer بتتميّز بجسم Shooting-brake من تلات بواب، وبمقصورة لأربع ركّاب، وكمان هيّي أوّل Ferrari بأربع مقاعد مزوّدة بمحرك V8 Turbo.
بالنسبة للتصميم، الطابع العام رياضي بامتياز، مع هيبة محفوظة على الطريق نتيجة الطول الإجمالي يلّي بيبلغ أقلّ بشي بسيط من 5 متار، ومع عرض بيبلغ حوالى المترين. والديناميكيّة محفوظة من خلال الإرتفاع يلّي بيبلغ متر و38 سنتيمتر بسّ، وكمان من خلال المقدّمة الطويلة مع مقصورة مثبّتة بالخلف، والخطوط الإنسيابيّة من مختلف الجوانب.
وبالنسبة للمقصورة فهيّي بتجمع بين الأناقة الراقية والنفس الرياضي، وبين الرحابة والعملانية وبين الشكل الديناميكي المعزّز. وتم تطبيق مبدأ ال Dual Cockpit ، لجهة الفصل بين الجزء الخاص بالسايق والجزء الخاص بالراكب الأمامي. واللافت إنّو بالرغم من الطابع الرياضي المعزّز لهال Supercar، العملانية محفوظة داخل المقصورة، وعلى مُستوى الصندوق كمان، ويلّي بتبلغ سعتو 450 ليتر، يعني قدرتو التحميليّة مُوازية لكتير من سيارات Sedan العائليّة. وبالنسبة لتجهيزات الراحة والترفيه فهيّي بتشمل شاشة عرض كبيرة قياس 10 "إنش"، ونظام معلوماتي متطوّر، ونظام تواصل رقمي، وغيرن كتير.
ميكانيكيًا، بتستفيد الفئة T GTC4Lusso من نسخة مجدّدة من محرك V8 سعة 3,9 ليترات مع 2 Turbo، بتولّد 610 أحصنة على سرعة 7500 دورة بالدقيقة، إضافة ل Torque بيبلغ 760 "نيوتن متر"، وبيُستخرج على سرعات دوران بتتراوح بين 3000 و5250 دورة بالدقيقة. وهالفئة المزوّدة بمحرك ال Turbo، بتندفع بإطاراتا الخلفيّة، ومش بالإطارات الأربعة متل GTC4Lusso العادية. ومن ضمن مُميّزات محرك ال Turbo لجديد، نظام إدارة متغيّر للدفع أو Variable Boost Management بأمّن التحكم الإلكتروني المُستمرّ بالعزم، بشكل بناسب أكتر النسبة المُختارة وسرعة السير. وهدير دوران محرّك V8 ما بقلّ جاذبية وتمايز، عن هدير دوران محرّك V12.
وبالنسبة للأداء، بتتسارع من صفر لمية كلم/س. خلال 3,5 ثوان، مع العلم إنّو سرعتا القُصوى بتبلغ أكتر من 320 كلم/س. ولكن GTC4Lusso T بتتفوّق على الفئة العادية، على مُستوى معدّل إستهلاك البنزين يلّي بيبلغ 11,6 ليترات لكل مية كلم. وهاي نسبة ممتازة ل Supercar كبيرة. واللافت إنّو إستجابة المحرك مع الضغط على دعسة البنزين، كتير سريعة ومباشرة.
الTransmission أوتوماتيكيّة من 7 نسب أماميّة مع نظام تبديل للنسب كتير سريع ودقيق، وشبيه بال Gearbox بسيارات ال F1. وبيبرز كمان نظام توجيه بالإطارات الأربعة، يلّي بأمّن رشاقة أكبر على السرعات البطيئة، وثبات أكبر على السرعات العالية. وفعاليّة التوجيه بالإطارات الأمامية والخلفيّة بتكتمل من خلال نسخة كتير حديثة ومتطوّرة من نظام التحكم الإلكتروني بالثبات ESP، ونظام التحكم الإلكتروني بال Differential باسم E-Diff.
والمساعدة الإلكترونية يلّي بتستفيد منّا بتتضمّن نظام كبح كتير فعّال مع ABS متطوّر بيتمتّع بفعالية عالية، وبيستفيد من توزيع إلكتروني دقيق لضغط الكبح على الإطارات. وهوّي قادر مع المكابح قياس 40 سنتيمتر بالأمام، وقياس 36 سنتيمتر بالخلف، على وقف هال Supercar بمسافة بتبلغ 33 متر خلال الكبح المُحكم من سرعة 100 كلم/س.
وبتشمل التجهيزات الإلكترونيّة كمان نظام SCM-E الخاص بالتحكم ببرمجة ال Suspension وبقساوة وفعاليّة مكوّناتا، ونظام SSC بجيلو التالت يلّي مخصّص لضبط أيّا إنزلاق جانبي لل Supercar الإيطاليّة القويّة، مع العلم إنّو الإطارات المُستخدمة مُمكن تكون قياس 20 "إنش"، والدواليب رياضيّة بامتياز وبتستفيد من جوانب منخفضة.
ونظام Manettino المشهور من Ferrari بيسمح للسايق الإختيار بين 5 وضعيّات قيادة مختلفة، مخصّصة للأداء المريح أو الرياضي، وللأداء على طرقات مبلّلة بالماي وحتى بالجليد كمان، مع توفّر وضعيّة خامسة بتسمح بوقف عمل نظام التحكم الإلكتروني بالثبات كليًا، في حال الرغبة بإستعراض المواهب الرياضيّة للسايق ولل Supercar بنفس الوقت!
وفينا نقول إنّو بفضل كل هالتجهيزات المتطوّرة، ونتيجة تنسيق عملا مع بعضا بدقّة عالية، بتتمتّع Ferrari GTC4Lusso T بأداء كتير قوي ومتماسك. ومن خلال التصميم الرياضي والقياسات لكبيرة والمقصورة المريحة والعملانية لأربع أشخاص، عم تفتح هال Supercar الباب لجيل جديد من سيارات GT الخارقة على الطريق والحلبات، والمناسبة للإستخدام اليومي كمان.