سنة 1925 أطلقت Rolls Royce أوّل جيل من Phantom لتاخد محلّ Silver Ghost، وكان إسما بوقتا New Phantom، ومن بعدا تواصل تقديم Phantom بأجيال متتالية، مع تسجيل توقّف قصير بين سنة 39 و50 بسبب إنعكاسات الحرب العالمية. وسنة 2003 تمّ تقديم الجيل السابع يلّي توفّر بفئات Sedan و Coupe و Drophead.
واليوم، وبعد حوالى 15 سنة، كشفت Rolls Royce عن الجيل التامن لجديد كليًا من Phantomلسنة 2018، ويلّي تقدّمت من بعد 5 سنوات كاملة من أعمال التطوير، لأنّو Rolls Royce كانت حريصة على الحفاظ على نجاح هالطراز يلّي شهرا عالميًا، خاصة إنّو الجيل التامن عم يتقدّم من بعد 14 سنة على تواجد الجيل السابق بالأسواق، يعني بعد فترة زمنيّة كافية لتقديم جيلين جداد عادة.
بداية التغيير لكبير كانت على مُستوى بنية الهيكل أو ال Platform يلي صارت مصنوعة بالكاملمن الألومنيوم، ويلّي إرتفعت قساوتابنسبة 30 % مُقارنة بالجيل السابق. وترافق هالشي مع تعديلات كبيرة على مُستوى مكوّنات ال Suspensionإضافة لتطوير نظام ضبط الإرتفاع الأوتوماتيكي ويلّي بيشتغل بضغط الهوا بتحكم إلكتروني، بهدف تعزيز توازن هال Limousine يلّي بيبلغ طولا 5 متار و76 سنتيمتر بالفئة المزوّدة بقاعدة الإطارات أو ال Wheelbase القصيرة. واللافت إنّو ال Suspension متوفّرة مع نظام بيستخدم مجموعة كاملة من كاميرات التصوير وأجهزة التحسّس أو ال Sensors، لمُراقبة الطريق خلال القيادة من صفر لمية كلم/س، والقيام بتعديل برمجة عمل ال Suspension تلقائيًا.
ومن ضُمن التجهيزات المُستحدثة بهالفئة من السيارات المترفة، إستخدمت Rolls Royce نظام إلتفاف بالإطارات الأربعة لأوّل مرّة، وهالشيلتعزيز مُرونة الحركة عُمومًا، وتحسين الثبات داخل المُنعطفات على السرعات العالية.
ولجعل الرحلة على متن Phantom كتير مُريحة ومفصولة تمامًا عن أيّا نوع من الضجيج، طوّر فريق العمل العزل الصَوتي داخل المقصورة بشكل كبير، من خلال زيادة سماكة أرضيّة ال Cabinواستخدام ألواح زجاجيّة مزدوجة، وعبر إضافِة مكوّنات خاصة وأنواع متطوّرة من الرغوة أو ال Foam لامتصاص الأصوات المزعجة. حتّى إنّو خيار الإطارات من إنتاج Continental إجا بعد تجارب كثيفة، مع العلم إنّو الجزء الداخلي من الرفاريف إستفاد من جهتو من مواد عازلة. واللافت إنو هالإجراءات رفعت الوزن الإجمالي بمقدار 130 كلغ. ليبلغ الوزن الإجمالي حوالى 3000 كيلوغرام أو 3 "طُون".
الترف الداخلي بيحكي عن حالو، مش بسّ من خلال نوعيّة الجلد والأخشاب والكروم وباقي المواد الفخمة المُستخدمة، ولكن كمان من خلال أسلوب جمع هالمُكوّنات مع بعضا، وطبيعة الألوان المختارة. ومن المُميّزات اللافتة سقف فخم مزوّد بحوالى 1100 لمبة صغيرة، ليأمّن للركّاب مشهد مُشابه لمنظر السما الصافية بالليل! وأجواء الترف الداخليّة تعزّزت أكتر وأكتر من خلال المساحات الواسعة المتوفّرة للركاب، خاصة بالجهة الخلفيّة، علمًا إنّو الفئة المزوّدة بقاعدة مُمدّدة بزيد طولا بمقدار 22 سنتيمتر عن Phantom العادية، ومع التذكير كمان إنّو كتير من مالكي هالسيارة البريطانية الفاخرةما بسُوقُوَا شخصيًا، ولكن بوَكّلوا سايق خاص بهالمُهمّة للجلوس بالخلف والتفرّغ لأعمالن أو حتى للترفيه عن أنفسن. ومُستلزمات الراحة الموضوعة بتصرّف الركاب منوّعة، وبتتضمّن شاشات عرض، وأنظمة تواصل رقمي، و Wi-Fi، وبرّاد صغير لحفظ المشروبات، وغيرا من التجهيزات، مع الإشارة إنّو من المُمكن التحكم ببعض الأنظمة الموجودة بهال Limousine الفخمة عبر مجموعة زرار بالخلف.
والتصميم الخارجي بيعكس الترف الداخلي، باعتبار إنّو تصميم Phantom بأكّد الإنتماء لأرقى فئات السيارات، مع أشكال فاخرة وفيّة لتراث Rolls Royce ولطراز Phantom بالتحديد متل الشبكة الأمامية المصنوعة من ال Stainless Steel، وكمان مع خطوط ولمسات جماليّة عصريّة وجذّابة وإضاءة بأشعّة اللايزر بتُوصل إنارتا لمسافة 600 متر. وبتبرز لبواب يلّي بتسكّر بتحكم كهربائي أوتوماتيكي بلمسة زرّ.
وميكانيكيًا، المحرك المُعتمد V12 بسعة 6,75 ليتر مع 2 Turbo، بولّد أكتر من 600 حصان، مع عزم بيتجاوز ال 900 "نُيوتن متر"، علمًا إنّو هال Torque بيتوفّر إعتبارًا من سرعات دوران منخفضة للمحرك بحدود 1700 دورة بالدقيقة.
ومن خلال ال Transmission الأوتوماتيكيّة فئة ZF من 8 نسب أماميّة، بتمّ نقل طاقة الدفع بفعاليّة للطريق، وتحديدًا للإطارات الخلفيّة. وهالشي بصير بذكا، نتيجة ربط عمليّة الإنتقال بين النسب بطبيعة الطريق، بفضل نظام بإسم Satellite Aided Transmission بيربط ال Gearbox بالأقمار الصناعيّة لتأمين أفضل إنتقال للنسب.
وعلى الطريق، التسارع من صفر لمية كلم/س. بصير بخمس ثوان فاصلة 2، وهيدا رقم كتير لافت لإنّو عم نحكي عن سيارة كتير تقيلة وطبيعتا الأساسيّة بتركّز على الفخامة والترف ومشّ على الأداء الرياضي والديناميكي. أمّا السرعة القُصوى فهيّ محدّدة إلكترونيًا عند 250 كلم/س.
وبالنسبة للمكابح، فعاليّتا واضحة وتصاعديّة، مع التذكير إنّو القيادة الراقية هيّي يلّي بتليق بPhantomومش أسلوب المُناورات الرياضيّة.
ولايحة التجهيزات الإلكترونية بتتضمّن كتير من الأنظمة، متل الرؤية الليليّة، والتنبيه من الحوادث، والتنبيه من الخروج من المسار، والتنبيه من المُشاة على الطريق، وضبط السرعة الأوتوماتيكي، وتشغيل المكابح تلقائيًا بحالات الخطر، وغيرا.