من ضُمن تقديمات Polaris المميّزة لسنة 2015، إطلاق RZR XP 1000 EPS العصرية والجديدة بنسخة كتير حصريّة بإسم Fox Edition. ومن ضمن مميّزاتا ألوان جديدة من الخارج مع طابع هجومي للخطوط العصريّة، علماً إنّو الطول الإجمالي بيتجاوز ال 3 متار، مع عرض بيبلغ 162 سنتيمتر وارتفاع بيبلغ 187 سنتيمتر. واللافت إنّو مصابيح الإضاءة بتتمتّع بشكل عصري، وبتستفيد من تقنيّة LED للإنارة.
وداخل المقصورة يلّي مخصّصة لشخصين، المقاعد جديدة مع أحزمة أمان من 6 نقاط تثبيت، إضافة لقضبان حماية بمتانة عالية. والتغييرات طالت لوحة القيادة مع عرض رقمي أو Digital Display، وشاشة عرض LCD، ونظام ملاحة أو GPS متطوّر، وبُوصلة توجيه أو Compass. والعدّادات كاملة متل بالسيارات العادية، مع عرض كامل لسرعة السير، ولسرعة دوران المحرك، وللمسافة المقطوعة، ولمستوى البنزين، وللحرارة، وغيرا. حتى إنّو من الممكن الإستفادة من مخرج USB، ومن مخرج كهربا 12 Volt، ومن نظام تواصل لاسلكي عبر تقنيّة ال Bluetooth. ومن ضمن المواصفات العمليّة، صندوق تحميل مع قفل.
ميكانيكياً، Polaris RZR XP 1000 Fox Edition بتستفيد من محرّك بيتكوّن من أسطوانتين، أو 2 Cylinders بسعة 999 سنتيمتر مكعّب، بيتغذّى من خزّان بنزين بسعة 36 ليتر، وهوّي أكتر من كاف لتأمين أداء قوي، خاصة إنّو الوزن الإجمالي بيبلغ 625 كيلوغرام بسّ.
وال Transmission أوتوماتيكيّة من دون أيّ تدخّل من السايق يلّي بيختار بين نظام الدفع بإطارين أو بالإطارات الأربعة حسب الحاجة والرغبة، وبيختار كمان وضعيّة الدفع السريعة High أو وضعيّة الدفع البطيئة Low، إضافة طبعاً لوضعيّة الرجوع للخلف.
ولتخفيف السرعة والسيطرة على الحركة السريعة، تمّ إستخدام أربع أسطوانات كبح أو Disc Brakes، مع نظام ضغط هيدروليكي للإطارات الأربعة.
وبالنسبة لأبرز مواصفات Polaris RZR XP 1000 Fox Edition، أنظمة تعليق أو Suspensions كتير متطوّرة، بتأمّن ثبات كتير عالي، وقدرة كبيرة على تحمّل الضغط الجانبي داخل المنعطفات القاسية، قد ما كانت السرعة عالية. ومن دون ما نفوت كتير بالتفاصيل التقنيّة، فينا نقول إنّو الفضل لهالتوازن المميّز، بيرجع لتكنولوجيا بإسم Bypass Shocks بتتكوّن من مُكوّنات مزدوجة داخل ال Suspensions، جزء منّا مخصّص للتعامل مع الإهتزازات الصغيرة، وجزء مخصّص للتعامل مع الخضّات الكبيرة، إضافة لمحاور تثبيت ببرمجة جديدة. واللافت إنّو هامش حركة التعليق الأمامي بزيد على 40 Cm، وهامش حركة التعليق الخلفي بزيد على 45 Cm، بشكل بيسمح بتجاوز كتير من العقبات على الطرقات الوعرة بسهولة كبيرة، علماً إنّو الإرتفاع عن الطريق بيبلغ 34 سنتيمتر. ومن ضمن المُواصفات الميكانيكية يلّي مِتوفّرة بشكل قياسي، نظام توجيه مع مساعد إلكتروني، علماً إنّو المقود أو ال Steering بيتميّز بسرعة تجاوب كتير عالية، بمعنى إنّو أيّا حركة لليمين أو الشمال بتترجم إلتفاف سريع للإطارات.
وبالنهاية، مع Polaris RZR XP 1000 Fox Edition بإمكان محبّي هالنوع من المركبات الخاصة بالطرقات الوعرة أو ال Off-road vehicle التمتّع بقيادة كتير ديناميكيّة وسريعة، بكل ثقة داخل المنعطفات، وخارج الطرقات المزفّتة، وبظلّ مستويات أمان عالية، ومستويات راحة كتير منيحة.