بعد 50 سنة من الإنتاج، وبعد خمس أجيال ناجحة، ال Generation السادسة من Ford Mustang صارت متوفّرة للمستهلكين، بمواصفات بتُوعد بإستمرار هالأسطورة بالأسواق كرمز للسيارات الرياضيّة الأميركيّة.
تصميم Mustang 2015 جديد بشكل كامل، ولكن من دون التخلّي عن أصالة هالسيارة الأميركانية العريقة، متل الغطا الطويل بالأمام، والصندوق القصير بالخلف. وبالنسبة للقياسات، زاد عرض Mustang مقارنة بالجيل السابق، بالوقت يلّي تمّ في، تخفيض إرتفاع السقف. ومن ضمن المميّزات، زاوية ميلان كتير قويّة للإزاز الأمامي وللإزاز الخلفي كمان، بشكل بعزّز الإنسيابية، وبذكّر ب Mustang Fastback القديمة.
بالإنتقال لل Cabin، جزء كبير من ال Dashboard مستوحا من تصميم الطيّارات، مع شكل رياضي طاغي، ومع فخامة محسّنة، وخاصة مع إهتمام يدوي بكتير من التفاصيل الداخليّة. وتمّ تحسين الراحة يلّي بتأمّنا المقاعد، ورفع عملانية الصندوق، وزيادة عدد التجهيزات المتطوّرة، متل Sync، و نظام Shaker Pro الصوتي الجديد.
ميكانيكياً، الخيارات كتيرة، وبتتضمّن محرك V6 سعة 3,7 ليترات بقوّة 300 حصان، ومحرك V8 سعة 5 ليترات بقوّة 420 حصان، وكمان Ecoboost Engine سعة 2,3 ليترات بسّ بقوّة خارقة بتوصل ل 309 أحصنة بفضل ال Turbo.
ولإنّو Mustang مُخصّصة لتأمين قيادة رياضية ممتعة، من الممكن إختيار Gearbox يدويّة، إضافة لل Transmission الأوتوماتيكيّة مع خيار تبديل السرعات بواسطة Paddles بال Steering.
والتوازن صار أفضل من السابق بعد إستخدام Suspensions جداد، قدّام وورا، إضافة لنظام ESC للتحكم الإلكتروني بالتماسك. ومستوى السلامة مرتفع مع نظام Blis لتحسين رؤية السايق الجانبيّة، و CTA للتنبيه من خطر الإصطدام خلال القيادة للخلف.