تُعتبر Chevrolet Spark سيارة للمدينة بامتياز، علمًا إنّا بتتمتّع بكل المُواصفات المطلوبة لتأمين قيادة سلسة وإقتصادية داخل المدينة وخارجا. وتمكّنت Spark من تاريخ إنطلاقا بالأسواق سنة 1998 لليوم، من التحوّل لوحدي من السيارات المُنافسة بقوّة بفئتا، بسبب تمتّعا بموقع ناجح ضمن مُعادلة "السعر – النوعيّة"، علمًا إنّا بتستهدف بشكل خاص جيل الشباب، وطلاب الجامعات، وكمان العِيَل لصغيرة. ومع الجيل الرابع لجديد من Spark، صارت المزايا يلّي أمّنت نجاح هال Hatchback من 5 بواب بالأسواق، أفضل من مختلف النواحي.

​

الشكل الخارجي عصري وشبابي من كلّ الجوانب، مع واجهة أماميّة بتفرض حُضورا على الطريق بالرغم من القياسات المدمجة، خاصة لجهة الطول يلّي بيبلغ 3 متار و64 سنتيمتر بسّ. وتمّ الإهتمام بشبكة التهوية أو ال Grill وبالإضاءة الأماميّة، بينما بتبرز التموّجات من الجوانب، وُصولاً للجهة الخلفية العملانيّة ويلّي بتخفي صندوق تحميل بسعة 300 ليتر. وإضافة للشكل الحلو من مختلف الجوانب، كان لافت إهتمام المهندسين لكبير بالخطوط الإنسيابيّة، بشكل عزّز سلاسة الحركة على السرعات العالية، بأقلّ درجة مُمكنة من الإحتكاك بالهوا. وهالشي إنعكس إيجابيًا على مصروف البنزين، وكمان على مُستوى الهدوء المتوفّر للركاب. وبالنسبة للألوان فهيّي جديدة وفِرحة، مع توفّر ألوان كتير شبابيّة وFunky وعلى المُوضة، ليلّي بحبّ.   

وبالإنتقال للمقصورة، صارت المساحات الداخليّة أوسع وأكبر من السابق، بعد زيادة طول قاعدة العجلات أو ال Wheelbase، بالرغم من إنّو الطول الإجمالي ل Spark صار أقلّ بمقدار 4 سنتيمترات مُقارنة بالجيل السابق. وتُعتبر المقاعد مريحة ومناسبة للجلوس لفترات طويلة. وبالنسبة للوحة القيادة، التصميم عصري مع تركيز على العملانية وسهولة الإستخدام من قبل السايق، خاصة إنّو زرار التحكّم مختصرة.

وإضافة للمُكيّف ولنظام الموسيقى، من الضروري الإشارة إنّو Spark هيّي السيارة الوحيدة بفئتا لمزوّدة بتكنولوجيا التواصل بالهاتف الذكي، مع توفّر نظام Apple Car Play. ومن ضُمن المُواصفات شاشة عرض قياس 7 "إنش" بتشتغل باللمس، مع نظام MyLink المتطوّر من إنتاج Chevrolet.

وليلّي بعدو بيعتقد إنّو الحجم الكبير ضرورة لتأمين الحماية، من الضروري تذكيرو إنّو Spark بتستفيد من هيكل معدني كتير متين، ومن مجموعة كاملة من ال Airbags، إضافة طبعًا لمساند الراس وأحزمة الأمان. ومن بين التجهيزات الإضافية ببعض الأسواق، نظام للتحذير من حوادث الإصطدام الأماميّة، ونظام بساعد السايق على الحفاظ على خط المسار.  

ميكانيكيًا، بيبرز المحرك لصغير بسعة 1,4 ليترات من فئة EcoTec ويلّي بولّد 100 حصان، بشكل بيتكفل بتأمين أداء نشيط ل Spark يلّي بتتمتّع بوزن كتير خفيف، بيبلغ حوالى 1000 كيلوغرام بسّ. وما مننسى إنّو الهدف من هالمحرك توفير أداء ممتاز بالنسبة لمعدّل إستهلاك البنزين يلّي مُمكن يُوصل لحوالى 400 كيلومتر بالتنكة على الطرقات السريعة والمفتوحة أو ال Highways. وبتتميّز ال Transmission بسلاسة الحركة، إن كان اليدويّة أو الفئة CVT.

وChevrolet Spark لجديدة يلّي بتندفع بإطاراتا الأماميّة بتتمتّع برشاقة كبيرة على الطريق، وبسهولة تحكّم كتير مميّزة، وأكيد بسلاسة لافتة داخل الشوارع الضيّقة. وإضافة لنظام ABS لمنع إنغلاق المكابح، من المُمكن إضافيًا الإستفادة من نظام إلكتروني للتحكم بالثبات.

ومن بين التجهيزات المتطوّرة، نظام بساعد على الرجوع للخلف، لتسهيل عمليّة ركن السيارة، بيستخدم أجهزة تحسّس وSensors قياسيًا، مع إمكان إختيار كاميرا تصوير خلفيّة إضافيًا، ببعض الأسواق.  

بالخلاصة، أكيد إنّو Chevrolet Spark بنسختا الأجدد، تُعتبر من السيارات العصريّة والشبابيّة الناجحة، لأنّو سعرا كتير منافس، ولأنّو حجما لصغير منّو على حساب جاذبية التصميم، ولا على حساب العملانية والراحة والأمان داخل المقصورة. ولأنّو كمان محرّكا الإقتصادي منّو على حساب أداءا النشيط والمناسب داخل المدن وخارجا.