Mercedes S-Class هيّي من أفخم السيارات بالعالم، ومع Maybach S600 الجديدة كلياً لسنة 2016، إرتفع سقف الفخامة والترف لمستويات مِش مَسبُوقة، مع توفّر إمكانيّات تعديل وتغيير كتير كبيرة أمام الزباين المُستهدفين، ويلّي بينتموا بطبيعة الحال لطبقة النِخبة المرتاحة مالياً. ومنذكّر إنّو أبرز أسواق هالفئة المميّزة من Mercedes Maybach  هنّي الولايات المتحدة الأميركية والصين، مع حضور مِهم بدول أخرى، ومنّا بطبيعة الحال منطقة الشرق الأوسط.

بالنسبة للتصميم، الخطوط الخارجية وفيّة لسيارات Mercedes S Class ولشخصيّة Maybach بطبيعة الحال، مع هيبة واضحة وحضور قوي على الطريق. وهالشي بيترافق مع طابع عصري، ومع لمسات جماليّة مختلفة، وحتى مع مكوّنات بطابع رياضي. الواجهة الأماميّة هجوميّة مع شبكة تهوئة أو Grill من الحجم الكبير، وعاكس هوا أو Spoiler بتصميم رياضي، ومصابيح إضاءة كتير فخمة. ومن الجوانب، نجح المهندسين بتأمين طابع حركة ديناميكيّة من خلال إعتماد خطوط متموّجة على مستوى البواب وملتوية على مستوى السقف، بالتزامن مع الكادرات المترفة المصنوعة من الكروم. وبالجهة الخلفيّة، بتأكّد مصابيح الإنارة LED يلّي بيطغى عَليَا اللون الأحمر، الطابع العصري، بالوقت يلّي بتعكس في، أربع فتحات لل Exhaust، النفَس الديناميكي. وخيارات الطلاء الخارجي كتير متعدّدة، وبتضمّ 14 لون قياسي من الممكن الإختيار من بَينُن، إضافة ل 8 ألوان حصريّة مخصّصة ليلّي بفضّلو المزيد من التمايز. وهالطلاء أو ال Paint بتمّ بأسلوب كتير متطوّر، بيتميّز بتعدد الطبقات، وببَريق ولمَعان كتير فريد، وبطبقة مقاومة للخَدش والتِجروُح. ومن ضمن المواصفات الخارجية اللافتة للنظر، دواليب خفيفة ومتينة قياس 20 "إنش"، مع إطارات ما بتقلّ ضخامة ولا فعاليّة.

وبالإنتقال لداخل Mercedes S-Class Maybach الجديدة كلياً، كلمة فخامة ما بتعبّر عن مستوى الترف المشّ مَسبُوق المتوفّر للركاب بالجهتين الأماميّة والخلفيّة. والمسألة ما بتقتصر على جلد Nappa يلّي بغطّي المقاعد وأجزاء كبيرة من المقصورة، ولا على الكروم أو الخشب، أو غيرن من المواد الفخمة، ولكن بتشمل العناية بأدقّ التفاصيل، وأسلوب التجميع النهائي للمكوّنات أو ال Components بظلّ صناعة يدويّة حرفيّة كتير واضحة. واللافت إنّو بإمكان الزباين الإختيار من بين 7 تصاميم مختلفة وفريدة من نوعا بالنسبة لشكل المقصورة، علماً إنّو لايحة التجهيزات القياسيّة كتير غنيّة، ومن الممكن تعزيزا أكتر وأكتر، عبر مجموعة من الخيارات الإضافية المميّزة.  

والمساحات المتوفّرة للركاب داخل مقصورة Maybach زادت بمقدار 20 سنتيمتر مُقارنة ب S Class العادية، وهالشي إنعكس إيجابياً على عوامل الراحة الداخلية بطبيعة الحال، مع إستفادة الركاب بالجهة الخلفيّة من الجزء الأكبر من هالرحابة المعزّزة، خاصة على مستوى الأرجل. والمقاعد بالخلف شبيهة بالمقاعد يلّي متوفّرة بدرجة "رجال الأعمال" داخل الطيّارات، لجهة إمكانيّات التعديل بتحكم كهربائي كامل للحصول على أفضل وضعيّة جلوس ممكنة. ومن الممكن الوصول لزاوية ميلان بتبلغ 43 درجة ونصّ، مع تحريك مساند الراس أو ال Headsets، وكمان مع الإستفادة من جوانب تثبيت قابلة للإنتفاخ، ومع نظام تدليك داخلي، ومع وسايد هوا أو Airbags مُدمجة داخل أحزمة الأمان الخلفيّة لمزيد من الفعاليّة. والكونسول الوسطي الخلفي بيتضمّن طاولات صغيرة بتنسحب عند الحاجة. وإضافة لعوامل الراحة والسلامة لكتير مميّزة، ومن شعار حرف M المزدوج، بيستفيد الركاب بالجهة الخلفيّة داخل Mercedes S-Class Maybach، وكتجهيز قياسي، من نظام ترفيه كامل، بيشمل شاشات عرض LCD كبيرة وواضحة كتيرة، ومُكبّرات صوت أو Speakers نقيّة وقويّة، علماً إنّو النظام الصوتي من تطوير Burmester. من جهة تانية فعاليّة المكيّف كتير عالية، مع إمكانية فصل درجات الحرارة بشكل مستقل لكل راكب، مع فلتر لتنقية الهوا من الغبار بالتزامن مع إطلاق روايح عَطِرة بالمقصورة. وما مننسى ال Touchpad يلّي بتسمح بالتحكم بكتير من التجهيزات، والقدرة على إستخدام "الإنترنت". ومن ضمن مواصفات المقصورة، نظام إضاءة داخلي كتير مميّز، وعزل صوتي كامل عن الخارج، هُوّي الأفضل بتاريخ صناعة السيارات، بحسب الصانع.  

​

على المستوى الميكانيكي، Mercedes Maybach S600 بتستفيد من محرك V12 بيتكوّن من 12 أسطوانة متل ما بدلّ إسمو، بسعة 6 ليترات، بولّد 530 حصان، مع حدّ أقصى لعزم الدوران بيبلغ أكتر من 820 "نيوتن متر"، إعتباراً من سرعة بتبلغ 1900 دورة بالدقيقة. وبفضل هالمحرك الضخم والقوي، من الممكن التسارع من صفر لمية كيلومتر بالساعة خلال 5,2 ثوان، مع سرعة قصوى محدّدة إلكترونياً عند 250 كلم/س. وهالشي بتمّ بسلاسة واضحة.  

ومن ضمن التجهيزات الإلكترونية لكتير متطوّرة المُستخدمة ب Mercedes Maybach S Class الجديدة، نظام تحكّم إلكتروني بحركة تموّج جسم السيارة بإسم Magic Body Control بيتولّى ضبط أيّ مَيلان جانبي بفعالية كبيرة، من خلال التدخّل تلقائياً بعمل وببرمجة ال Suspensions. وبيكتمل عمل هالنظام بفضل تقنيّة مخصّصة لمَسح سطح الطريق، بإسم Road Surface Scan. وهالشي بيسمح بتحديد طبيعة الطريق، ونوع الزفت، وغيرا من المعطيات الضرورية ليشتغل النظام الإلكتروني بفعالية أكبر

ومنبقى مع التجهيزات الإلكترونية المتطوّرة، ومنذكر Pre-Safe Brake يلّي هوّي عبارة عن نظام كبح إستباقي، بيتميّز عن الأنظمة الشبيهة المتوفّرة ببعض السيارات الفخمة المنافسة، بتقنيّة التعرّف على المُشاة على الطريق، لتشغيل المكابح بحالات الخطر الوشيك. ومع Pre-Safe Plus الحماية الإستباقيّة ما بتقتُصر على الجهة الأماميّة، ولكنّا بتشمل التوقف التلقائي خلال الرجوع للخلف كمان، بمجرّد مُصادفة أيّ خطر إصطدام مُحتمل. ومن خلال نظام بيحمل إسم Bas Plus Cross Traffic Assist صار عبور التقاطعات أقل خطر، بفضل تقنيّة إشعاعات راداريّة بتكشف أماكن تواجد السيارات أمام وإلى جوانب Maybach، بشكل بيسمح للسايق بتدارك مخاطر الإصطدام قبل وقوعا. ولايحة التجهيزات المتطورة بتشمل نظام لمنع خروج السيارة عن خط سيرا، ونظام تبديل تلقائي للإنارة بين المصابيح البعيدة والمصابيح القريبة. وبشكل عام، تركيز السايق خلال القيادة بضَلّ على الطريق، من خلال نظام Head-Up Display يلّي بيُعرض معلومات مُفيدة على الجزء الداخلي من الزجاج الأمامي. ومن الممكن كمان الإستفادة من نظام للرؤية الليليّة.

وأكيد إنّو مع سيارة متل Mercedes Maybach S600 ، فينا ناخد فكرة عن المستوى يلّي وصلتلو صناعة السيارات المترفة جداً على مستوى العالم، علماً إنّو هالمواصفات وهالتقنيّات مَنّا متاحة إلا لعدد كتير محدود من الصانعين ومن السيارات.