تاريخ شفروليه كمارو كتير عريق، وبيرجع لحوالى 50 سنة، وتحديداً لأيلول 1966، تِخلّلا وقفة صغيرة بين الجيل الرابع يلّي توقّف إنتاجا سنة 2002 والجيل الخامس يلّي إنطلق سنة 2010. واليوم، وبعد إطلاق الجيل السادس الجديد كليّاً لسنة 2016، قدّمت شفروليه الفئة المكشوفة يلّي بتأمّن متعة إضافية خلف ال Steering.
تصميم Camaro Cabrio 2016 كتير جذّاب وبيتفوّق على Camaro Coupe بطبيعة الحال. المُقدّمة هجوميّة مع واجهة أماميّة جريئة، بتتعزّز بفضل فتحات الهواء الكبيرة، ويلّي بتمتدّ لغطا المحرك. ومن الجوانب الخطوط سلسة وإنسيابيّة، مع تسجيل زاوية ميلان كتير قاسية للزجاج الأمامي. ومن الجهة الخلفيّة، الطلّة ما بتقلّ قوّة عن الجهة الأماميّة، مع حضور قوي للصادم أو ال Bonnet، وكمان لمصابيح الإضاءة الكبيرة ويلّي بيطغى اللون الأحمر عليا.
وبالنسبة للسقف المتحرّك، التحكّم بوضعيّتو بتمّ عبر نظام إلكترو – هيدروليكي، بشكل أوتوماتيكي بالكامل، بمعنى إنّو عمليّة الفتح أو الإغلاق بتتنفّذ بمجرّد الضغط على الزرّ المخصّص لهالشي، من دون الحاجة للقيام بأيّا حركة يدوية. ومن المُمكن التحكم بعمليّة الفتح أو الإغلاق عبر جهاز التحكم عن بُعد أو ال Remote Control الخاص بالسيارة، خلال حوالى 16 ثانية بسّ. أكتر من هيك، ما في مشكلة بتعديل وضعيّة السقف أثناء تحرّك Camaro Cabrio، شرط ما تتجاوز السرعة الخمسين كيلومتر بالساعة. والسقف المتحرّك بينضبّ بشكل كامل داخل جزء من الصندوق، وبيتغطّى أوتوماتيكياً بلوح صلب مُبتكر وجديد، من دون أيّا تأثير على مساحات الجلوس داخل المقصورة. ومن حسنات السقف كمان إنّو بأمّن عزل المقصورة عن الحرارة الخارجيّة وعن ضجيج الطريق، بفضل إستفادتو من طبقات متعدّدة ومن مواد عازلة متطوّرة.
إشارة إنّو ال Cabin يلّي بتعطي الأولويّة للسائق، ولقدرتو على التحكم والسيطرة، بتستفيد من طابع رياضي واضح، ومن مكوّنات فخمة، ومن تقنيات وتكنولوجيا كتير متطوّرة. والمقاعد مدروسة لتأمين الثبات للأجسام بمختلف ظروف القيادة، علماً إنّا مريحة حتى خلال القيادة لمسافات طويلة. ومن ضمن المميّزات التصميميّة الداخلية، لوحة قيادة كتير عصريّة ورياضيّة، مع عدّاد لتسجيل أوقات اللفات على الحلبات، بيتوسّط عدّاد سرعة السير وعدّاد سرعة دوران المحرك. ومن المُمكن إختيار الإضاءة المناسبة للأجواء حسب رغبة السايق أو الركاب.
وبالنسبة للتجهيزات المتوفّرة، فينا نقول إنّو عوامل السلامة والأمان كاملة داخل Camaro Cabrio، ومُتطلبّات الراحة والترفيه مأمّنة بشكل كبير قياسياً مع بعض التجهيزات الإضافية لكتير مميّزة ومتطوّرة.
ميكانيكياً، Chevrolet Camaro Cabrio متوفّرة بكامل مجموعة المحركات المخصّصة لشقيقتا ال Coupe، بدءاً بمحرك الأربع أسطوانات سعة ليترين مع Turbo بقوّة 275 حصان، مروراً بمحرك V6 سعة 3,6 ليترات يلّي بولّد 355 حصان، وصولاً للفئة SS المزوّدة بمحرّك بولّد 455 حصان، علماً إنّو V8 سعة 6,2 ليتر.
وخيارات ال Gearboxes بتشمل Transmission يدويّة من ست نسب أمامية، وخصوصاً ال Transmission الأوتوماتيكيّة المزوّدة ب 8 نسب أماميّة، مع إمكان نقل الحركة يدوياً في حال الرغبة.
وقبل ما نحكي عن أداء Camaro المكشوفة، من الضروري الإشارة إنّو المهندسين إشتغلوا كتير على تخفيف الوزن، وإستخدموا ال Aluminum بكثافة، إن كان بالنسبة للإطارات أو لمكوّنات نظام التعليق، علماً إنّو دور ال Suspension الخفيف كتير مهم لتعزيز ديناميكيّة الحركة. وكانت النتيجة التخلّص من حوالى 90 كيلوغرام، علماً إنّو الهيكل صار أكتر صلابة من السابق.
وبإمكان Chevrolet Camaro Cabrio الجديدة التسارع من صفر لمية كيلومتر بالساعة خلال أوقات قياسيّة بفئتا، علماً إنّو هالشي بتمّ بظلّ مستوى عالي من الثبات والتماسك. والتوازن مكفول بفضل الهيكل الخفيف، والتوزيع المدروس للوزن، وإنخفاض "نقطة التقل" أو ال Center of Gravity، ومحاور الدوران العريضة، والإطارات المميّزة. وللسيطرة على الأداء القوي، تمّ إستخدام مكابح Brembo، بشكل قياسي بالفئة SS، وإضافياً بالفئة LT ليلّي بحبّ من الزباين.
وما في شكّ إنّو Chevrolet Camaro، وبطبيعة الحال الفئة Cabrio المكشوفة منا، بتستفيد من سمعة ممتازة بين المُستهلكين، لتأمين نسبة مبيعات مرتفعة. فكيف إذا هالشي تعزّز من خلال جيل جديد كلياً، بيتمتّع بكل مواصفات الجاذبيّة والقوة والديناميكيّة والتطوّر التكنولوجي؟!