سنة 1993 أطلقت Mercedes سيارة عائليّة بحجم صغير بإسم C Class، وإعتباراً من سنة 2015 صارت هال Compact Sedan بجيلا الرابع، علماً إنّا توفّرت دايماً بخيار Coupe ليلّي بحبّ. ومع C Class Coupe لسنة 2016، عم بتتابع Mercedes فلسفتا بهالمجال، من خلال الجمع بين التصميم الرياضي والجذاب، والمقصورة العصريّة والفخمة، والأداء النشيط والسلس. ومن أهمّ الصفات كمان، إنطباع عام بالإنتماء لفئة أعلى وأفخم وأغلى من السيارات!
على مستوى التصميم، بتتمتّع C class Coupe بطلّة كتير ديناميكيّة من مختلف الجوانب، مع واجهة أماميّة هُجوميّة، وخطوط بتليق بجسم من بابين. وهالشي تعزّز أكتر وأكتر بعد خفض إرتفاع ال Suspension ب 15 ميلليمتر، وإستخدام إطارات من الحجم الكبير وتحديداً قياس 18 "إنش"، علماً إنّو الطول الإجمالي زاد بفارق كبير مُقارنة بالجيل السابق. وعم نحكي عن 95 ميلليمتر إضافية على مستوى الطول، وعن 40 ميلليمتر إضافي على مُستوى العرض، بشكل عزّز الحُضور على الطريق، علماً إنّو الوزن العام تراجع كمان بفضل زيادة إستخدام الألومنيوم. من جهة تانية، ومن ضمن الفروقات عن الفئة Sedan إنّو الخطوط المتموّجة بتتجاوز حدود الإطارات الخلفيّة لتأمين طابع ديناميكي أكبر، خاصة إنّو خط السقف بيتمتّع بإلتواء واضح. واللافت إنّو بعض الأشكال إستوحيت من S Class لتأمين طابع الفخامة ولو بحجم مصغّر، بموازاة النفس الرياضي بطبيعة الحال.
بالإنتقال لمقصورة 2016 Mercedes C Class Coupe ، وبالرغم من الإحتفاظ بالطابع الشبابي والرياضي، من الواضح إنّو تمّ تحقيق خطوات إضافية على مستوى المكوّنات والتجهيزات، بشكل أمّن إنطباع نُضوج أوضح من السابق. والتداخل والتموّجات يلّي بميّزو لوحة القيادة أو ال Dashboard والكونسول الوسطي والأجزاء الداخلية من الأبواب، بعزّزو النفس الرياضي الخاص بهال Coupe الألمانيّة. ولتأمين المزيد من التمايز، تمّ إستخدام مجموعة من الألوان المتناقضة أو يلّي بتكمّل بعضا. وهالنفس الرياضي ما بيمنع المُستهلكين من الإختيار من بين مجموعة كبيرة من التجهيزات والمكوّنات يلّي بترفع الفخامة الداخلية لأقصى الدرجات.
وبالنسبة للعملانية، وبعد زيادة طول قاعدة الدواليب أو ال Wheelbase بمقدار 80 ميلليمتر، وزيادة العرض الإجمالي كمان، إستفاد الركّاب داخل ال Cabin من مساحات إضافيّة على كل المستويات، بشكل عزّز راحة الجلوس، علماً إنّو المقاعد رياضية الشكل، ووضعيّة الجلوس منخفضة بشكل عام.
ومن الضروري الإشارة إنّو C Class Coupe بتستفيد من مجموعة كبيرة من التجهيزات الفخمة والمتطوّرة بشكل قياسي أو Standard. ولأنّو ما في مجال لتعدادا، رح نكتفي بالإشارة لوجود نظام Multimedia من الجيل الجديد للترفيه السمعي والبصري العالي، ورح نتوقّف كمان عند Feature كتير متطوّرة، وهيّي ال AC يلّي مُمكن يشتغل بالتنسيق مع ال Navigator، بشكل بأمّن إغلاق فتحات الهواء أوتوماتيكيًا قبل الدخول لأيّا نفق، وكمان إعادة فتحا بمجرّد عبور هالنفق!
ميكانيكياً، بتتوفّر Mercedes C Class Coupe لسنة 2016 بمحرّكات قويّة، الأبرز من بينا محرك بسعة ليترين مع Turbo بولّد 245 حصان، وبأمّن أداء كتير ديناميكي على الطريق، خاصة لجهة قدرات التسارع النشيط. ومن بين الخيارات V6 Engine مع Turbo مزدوج، علمًا إنّو الفئة الأقوى رح بتكون ال C63 AMG مع V8 بولّد أكتر من 500 حصان. وإضافة للدفع بالإطارات الخلفية، خيار الدفع الرباعي 4 Matic رح يكون متاح ببعض الأسواق، علماً إنّو ال Transmission المتوفّرة أوتوماتيكيّة من 7 نسب.
وصحيح إنّو الوزن العام صار خفيف أكتر من السابق، ولكن متانة البنية صارت أعلى، وهالشي إنعكس إيجابياً على ال Performance وعلى شعور السايق خلف ال Steering كمان. وإضافة لل Suspension العادية يلّي كفيلة بتأمين الثبات والتماسك بمختلف ظروف القيادة، بموازاة أعلى مستويات راحة الجلوس، من المُمكن إختيار ال Airmatic Suspension يلّي بتشتغل بضغط الهوا وبتحكم إلكتروني، لتبديل القساوة والحركة. وفعالية هالفئة المتوفّرة إضافياً بتكتمل من خلال 5 وضعيّات قيادة مختلفة، لكل مِنّا برنامج بناسب الأداء المُستهدف، أكان إقتصادي، أو مريح، أو رياضي، علماً إنّو الخيارات المتاحة بتشمل كمان الوضعيّة الرياضيّة المعزّزة Sport +، ووضعيّة التحكم الشخصي Individual.
وبالنسبة للتجهيزات الإلكترونية المتطوّرة، عددا كبير، وهيّي بتلعب دور مهم بمساعدة السايق على السيطرة على الأداء، وعلى تجنّب حوادث الإصطدام، وعلى التمتّع أكتر بالقيادة. وبهالإطار، منذكر نظام Attention Assist لتنبيه السايق في حال ملاحظة أيّا عوارض نعس أو تعب على وجّو وعيونو. وبيبرز نظام Collision Prevention Assist Plus يلّي بيطلق تنبيهات سمعيّة عند إستشعار أيّا حادث إصطدام وشيك، ويلّي بيتدخّل أوتوماتيكياً على المكابح، في حال عدم تحرّك السايق بحالات الخطر. ومن ضمن الخيارات التكنولوجيّة المُتاحة، نظام Distronic Plus يلّي هوّي عبارة عن مُثبّت سرعة "متأقلم"، بمعنى إنّو هال Cruise Control بخفّف وبزيد السرعة أوتوماتيكياً حسب حركة السير قدّام C Class Coupe. ومع ال Active Lane Keeping Assist ما بتخرج السيارة عن خط سَيرا من دون تدخّل أوتوماتيكي لإعادتا لمسارا. وصارت هال Mercedes لصغيرة ولكن الفخمة، مزوّدة بنظام Pre Safe Plus يلّي مش بسّ بحضّر السيارة والمقصورة لأيّا حادث إصطدام مُحتمل، ولكنّو بنبّه بقيّة السايقين من خلال تشغيل الإشارات أو ال Warning Lights تلقائياً. والخيارات المتاحة بتتضمّن كمان نظام للمساعدة على ركن C Class Coupe بإسم Active Parking Assist، وكاميرات تصوير لإطلاع السايق على كامل محيط سيارتو.