مع RZR XP 1000 أمّنت Polaris للمستهلكين ATV من مقعدين مع سقف،  وبيتميّز بعملانية عالية وبقدرات فعّالة.

التصميم عصري وجذّاب، مع خطوط Modern وقويّة بنفس الوقت على مدى كامل الطول يلّي بيبلغ حوالى 3 أمتار. والإضاءة LED، مع إنارة بيضا بالأمام، وحمرا بالخلف. ومع إنّو هال Vehicle مخصّصة للسايق ولراكب برفقتو بسّ، بيبلغ وزنا 625 كيلوغرام، نتيجة قفص الحماية المصنوع من الفولاذ، ويلّي بشكّل نوع من السقف المتين. ومن الممكن تثبيت شادر من القماش على سكك الحديد للحماية من الشمس.  وداخل ال Cabin الجديدة، بتبرز المقاعد يلّي بتتمتّع بتصميم حلو شبيه بمقاعد Recaro، مع إمكان تعديل وضعيّة التثبيت، لتأمين أعلى راحة جلوس ممكنة.

المحرك بيتكوّن من تنان Cylinders بسعة 999 سنتيمتر مكعّب، مع بخ إلكتروني للبنزين، بولّد 107 أحصنة، يعني بزيادة 18 حصان مقارنة ب RZR 900 السابقة.

وال Gearbox أوتوماتيكية تصاعدية، يعني ما بيشعر السايق بتبديل النسب، علماً إنّو من الممكن الإختيار بين وضعيّة الدفع بإطارين أو وضعيّة الدفع بالإطارات الأربعة، حسب الحاجة والرغبة. ولتفعيل قدرات تجاوز الطرقات الوعرة أكتر وأكتر، تمّ إستخدام Suspensions كتير متينة، بتتكوّن من وصلات تثبيت مزدوجة بالأمام، ومن وصلات متحرّكة بالخلف، علماً إنّو هامش الإنضغاط أو ال Travel تبع هال Suspensions بيوصل ل 40 سنتيمتر بالأمام، ول 46 سنتيمتر بالخلف. ومنذكر إنّو الإرتفاع عن الطريق أو ال Ground Clearance بيبلغ أكتر من 34 سنتيمتر.

والتسارع من صفر لسرعة خمسين كيلومتر بالساعة بتمّ خلال 5,3 ثوان. وبالنسبة للمكابح، RZR XP 1000 من Polaris مزوّدة ب Discs هيدروليكيّة للإطارات الأربعة، علماً إنّو هالإطارات المخصّصة للطرقات الوعرة بتتمتّع بحجم كبير مع Wheels قياس 14 "إنش". ولإنّو وزن الإطارات تقيل، كان من الضروري إستخدام Steering مع مساعد كهربائي، لتسهيل مهمّة الإلتفاف على السايق.  

من جهة تانية، تمّ إستخدام خزّان بنزين بسعة 36 ليتر، يعني بسعة قريبة من بعض السيارات المدمجة. وهالشي بيسمح بعبور مسافات طويلة من دون الخوف من الإنقطاع من الوقود.