أطلقت McLaren سيارتين جداد، هنّي 570S Coupe من معرض New York و540C Coupe من معرض Shanghai. والهدف رفع مستوى مبيعات الشركة بشكل سريع من هلّق لسنة 2020، باعتبار إنّو هالسيارات الرياضية، ويلّي بتصنّفون McLaren تحت خانة ال Sport Series Cars أو "سيارات الفئة الرياضيّة"، بينباعوا بأسعار كتير مدروسة ومنافسة لسيارات متل Audi R8 و Porsche 911 Turbo S و Ferrari California، وغيرا، وبالتالي الآمال كبيرة عَليُن لجذب زباين جداد.
بالنسبة ل 540C Coupe فهّيي بكل بساطة أرخص سيارة بتحمل إسم وشعار McLaren، هالشركة العريقة بعالم السباقات، ويلّي قرّرت بالماضي القريب، وتحديداً من سنة 2011 البدء بانتاج سيارات رياضية للتسويق التجاري. بَسّ السعر المدروس، نسبياً، لإنّو عم نحكي عن حوالى 160,000 دولار أميركي من دون رسوم التسجيل والضرايب بكل بلد، ما منع هال Supercar من إنّو تتمتّع بمواصفات رياضية بامتياز بالشكل وبالمضمون.
التصميم العام رياضي مع خطوط إنسيابيّة من مختلف الجوانب، ومقدّمة هجوميّة، متلا متل تصميم الجزء الخلفي، خاصة على مستوى مخارج ال Exhaust وعواكس الهوا أو ال Spoilers. ومن الجوانب، التمايز واضح وبيتمثّل بالأبواب يلّي بتفتح للأعلى، وبفتحات الهوا الكبيرة داخل الرفاريف الخلفيّة، وكمان بالإطارات قياس 19 إنش بالأمام و20 إنش بالخلف، مع دواليب Pirelli P Zero.
وداخل المقصورة يلّي بتساع لشخصين، الطابع رياضي وديناميكي بدون أدنى شكّ، ولكن مع حرص كبير على تأمين مختلف عوامل الراحة المناسبة للإستخدام اليومي، إضافة طبعاً لمستلزمات السلامة والأمان. وبتبرز خصوصاً شاشة العرض يلّي بتشتغل باللمس ويلّي بتسمح بالتحكم بكتير من تجهيزات الرفاهيّة.
الهيكل خفيف ومصنوع من الكربون من خلال تقنيّات مُستخدمة بسيّارات السباق، مع محرك V8 بسعة 3,8 ليترات مع 2 Turbo، بولّد 540 حصان، وعزم بيبلغ 540 "نيوتن متر". ومن ضمن مميّزاتو، وضعيّة وسطيّة، ونظام "توقّف – إنطلاق" بيتولّى وقف عمل المحرك، وكمان إعادة تشغيلو، بشكل أوتوماتيكي لخفض معدّل إستهلاك البنزين. وال Gearbox أوتوماتيكيّة من سبع نسب، بتنقل القوّة للإطارات الخلفيّة.
وأداء McLaren 540C Coupe بيحكي عن حالو، باعتبار إنّو هالسيارة الرياضية بامتياز ويلّي بيبلغ وزنا 1311 كيلوغرام، بتتسارع من صفر لمية كيلومتر بالساعة خلال 3,5 ثوان، ومن صفر لميتين كلم/س. خلال 10,5 ثوان، علماً إنّو سرعتا القصوى بتبلغ 320 كلم/س.
ومن أبرز مُواصفاتا التقنيّة، جهاز كبح بيشتغل بتكنولوجيا مأخودة من سيارات الفورمولا واحد، بتسمح بتشغيل المكابح داخل المنعطفات. وبيبرز كمان نظام التعليق المتطوّر ويلّي بيضمن التوازن التام على الطرقات وعلى الحلبات كمان. وبإمكان السايق التدخّل لاختيار البرمجة المناسبة حسب الرغبة.
وبالإنتقال ل McLaren 570S Coupe فهيّي أغلى بفارق محدود مُقارنة ب 540C Coupe، وأقوى وأسرع منّا، ولكن بشكل طفيف كمان. ووضعت شركة "مكلارين للسيارات" كل خبرتا بإنتاج السيارات السياحية، وكل خبرتا المأخودة من مشاركتا الكتيرة بسباقات السيارات، لتأمين Supercar كتير ديناميكيّة وقويّة، وبنفس الوقت سلسة ومريحة. ومن ضمن ممُيزاتا اللافتة، إنّا بتجمع بقالب واحد بين الهيكل المصنوع من الكربون، وجسم السيارة المصنوع بجزء كبير من الألومنيوم، والوضعيّة الوسطيّة للمحرك، والدفع بالإطارات الخلفيّة.
بالنسبة للتصميم، فهوّي بيحمل كل جينات McLaren لناحية قوة الحضور على الطريق، مع خطوط إنسيابيّة بتساعد على تعزيز التوازن العام، وجرأة برسم عواكس الهوا أو ال Spoilers وفتحات ال Exhaust كمان. وفي كتير من المكوّنات المشتركة مع 540C Coupe، منا متلاً حجم الإطارات، ونوعيّة الدواليب.
وبالإنتقال للمقصورة، من السهل صعود الركاب ونزولن من هالسيارة الرياضية، بفضل عناية خاصة طالت شكل الدعامات الجانبية وزاوية فتح الأبواب. وإذا كان الشكل الداخلي العام بأكّد الطابع الرياضي، خاصة على مستوى المقاعد يلّي بتحضن أجسام الركّاب، ولوحة القيادة الديناميكيّة، فالفخامة محفوظة من خلال الجلد والكروم والمواد الغالية المُعتمدة. والإستخدام اليومي المريح مكفول من خلال تجهيزات الترف الكاملة، متل المُكيّف، والنظام الموسيقي Bowers & Wilkins، وشاشة العرض لكبيرة ويلّي بتشتغل باللمس. واللافت إنّو المهندسين فضّلوا إختصار عدد أزرار التحكّم التقليديّة لصالح التحكّم الرقمي.
ميكانيكياً، بتستفيد 570S Coupe من نفس المحرك V8 بسعة 3,8 ليترات مع Turbo مزدوج، ولكنّو بولّد 570 حصان بفضل برمجة مختلفة، وبتنتقل هالطاقة عبر Transmission أوتوماتيكية من سبع نسب، وتِنين Clutch، للإطارات الخلفيّة.
ومع وزن إجمالي بيبلغ 1313 كيلوغرام، من الممكن التسارع ب McLaren 570S Coupe من صفر لمية كيلومتر بالساعة خلال 3,2 ثوان بسّ، ومن صفر لميتين كلم/س. خلال 9,5 ثوان، علماً إنّو السرعة القصوى بتبلغ 328 كلم/س.
ومن ضمن المُواصفات يلّي بتأكّد الطابع الرياضي الديناميكي، أسطوانات كبح مصنوعة من السيراميك لفعالية أكبر، وSuspension مُتأقلِمة، بمعنى إنّا بتستفيد من برمجة مُتبدّلة للحفاظ على أعلى ثبات وتماسك بمختلف ظروف القيادة. و570S Coupe مزوّدة كمان بتجهيزات إلكترونية لمساعدة السايق على السيطرة والتحكم على السرعات العالية وداخل المنعطفات. وبإمكان السايق الإختيار بين تلات برامج مُختلفة هيّي العادية والرياضية والبرنامج المخصّص لحلبات السباق. ومع كل إختيار بتتبدّل برمجة عمل نظام الدفع وحركة ال Suspension، وهالشي بساعد على التأقلم مع طبيعة الطريق وظروف القيادة ككل.
وبالخلاصة، أكيد إنّو McLaren عم تكتب صفحة جديدة بتاريخا، من خلال تقديما 540c Coupe و 570s Coupe لأنّو عم تفتح الباب أمام إرتفاع عدد زباينا، وعدد سياراتا على الطريق، ورح تُوصل بالتالي لقلوب مجموعات واسعة من محبّي السيارات الرياضية بامتياز، ويلّي بتحمل إسم فريد، ولكن المناسبة للقيادة اليومية المريحة والمترفة، بسعر مبيعر مدروس نسبياً.