بعد نجاح Santa Fe قرّرت شركة هيونداي الكوريّة سنة 2004، إطلاق فئة مدمجة أو Compact ضمن ال Crossover واسمتها Tucson، من وحي مدينة Tucson بولاية Arizona الأميركيّة. ونجَح هذا الطراز بتحقيق حضور عالمي واسع، بفضل مُعادلة "السعر – النوعيّة". وهذا الشي يعزّز مع إطلاق الجيل التاني سنة 2009. واليوم ومع الجيل الثالث الجديد كليّاً، تنتقل Tuscon لموقع أقوى ضمن الفئة الذي ينافس فِيا، بفضل تحسينات مهمّة على كل المستويات.

بالنسبة للتصميم، فهُوّي شِهد تغيير كبير، خاصة على مستوى الواجهة الأماميّة الذي صارت تستفيد من شبكة تهوئة وحدة كبيرة بدلاً من شبكتين صغار بالسابق. وترافق هالشي مع مصابيح إضاءة أكبر وأجمل بتشتغل بتقنيّة LED للإنارة، مع توفّر نظام إضاءة بيتحرّك تلقائياً داخل المنعطفات لتعزيز رؤية السايق، كتجهيز إضافي.  ومن الجوانب، زادت الطلّة الديناميكيّة بعد التعديلات الذي تم إدخالها على الرفاريف وخط السقف، بالتزامن مع زيادة الطول الإجمالي. ومع إطارات خفيفة قياس 17 "إنش" وبتتمتّع بتصميم جريء، إكتمل حضور هال Crossover على الطريق، وتأكد مرورو بشكل بيلفت الإنتباه. ومن الجهة الخلفيّة، ما بقلّ Tuscon جاذبيّة عن باقي الجهات، بفضل مصابيح الإضاءة العصريّة، والجانح بأعلى الباب الخلفي وفتحات ال Exhaust.    

بالإنتقال للمقصورة، التحسينات طالت نوعية المواد المُستخدمة والذي صارت أنعم وأفخم من السابق، بالوقت الذي تمّ تطوير جاذبيّة وعملانيّة لوحة القيادة أو ال Dashboard، مع إستخدام Steering مزوّد بمجموعة من زرار التحكّم. والكونسول الوسطي مقسوم لعدّة أجزاء، مع مكيّف وجهاز موسيقى بالوسط، ومع شاشة عرض بالأعلى تُستخدم لنظام الملاحة أو ال Navigation System وكمان لعرض صور كاميرا التصوير الخلفيّة الذي بتتوفّر إضافيّاً. والتطوير طال المقاعد الذي من المُمكن تكون مكسوّة بالجلد، علماً إنّا بتأمّن راحة جلوس عالية، إضافة للثبات داخل المنعطفات. وبيتوفّر إضافياً نظام تحكّم كهربائي بوضعيّة هالمقاعد الذي ممكن تستفيد إختيارياً كمان من نظام تهوئة داخلي.  وبالرغم من الحجم الصغير نسبياً، المساحات المتوفّرة للركّاب كتير منيحة، خاصة على مستوى المقاعد الخلفيّة. ولالذي بيحبّوا يرفعوا شعور الإنشراح لأقصى الدرجات، بإمكانن طلب فتحة السقف ال Panoramic الكبيرة كتير، والذي بتمتدّ من المقاعد الأماميّة وصولاً للمقاعد الخلفيّة، بشكل بيسمح بدخول الهوا وأشعّة الشمس.

 

ويُعتبر الصندوق كبير علماً إنّ المقاعد الخلفيّة قابلة للطيّ بحال الحاجة لرفع سعة التحميل. ومن الممكن إضافياً إختيار نظام تحكّم أوتوماتيكي بعمليّة فتح باب الصندوق، بمجرّد وجود مفتاح Tucson على مسافة بتقلّ عن متر واحد لمدّة تلات ثواني متواصلة، بشكل بساعد كتير المُستخدم إذا كان حامل غراض بإلإيدتان وبدّو يفتح الصندوق.  

ميكانيكيّاً، بتتوفّر Hyundai Tucson بعدّة محركات بحسب الأسواق، وبالشرق الأوسط رح يكون في 3 خيارات، بتبلّش مع المحرك الصغير والإقتصادي سعة 1,6 ليترات مع Turbo بولّد 176 حصان. ومن الممكن إختيار محرك تاني من 4 أسطوانات كمان بسعة ليترين وبقوّة 164 حصان، علماً إنّو المحرك الأقوى بسعة 2,4 ليترات بولّد 185 حصان.

ومع ال Echo System الذي بتمّ تشغيلو بزرّ خاص، بيتولّى هالنظام الإقتصادي خفض إستهلاك البنزين للحدّ الأدنى، من دون تضحية كبيرة بقوّة الأداء.

وبتبرز ال Transmission الأوتوماتيكيّة من ست نسب أماميّة، مع إمكان التحكم بنقل الحركة يدوياً بفضل نظام Shiftronic. وببعض الأسواق، من المُمكن إختيار ال EchoShift Transmission الذي مِزوّدة بسبع نسب أماميّة وبتستفيد من Clutch مزدوج لتسريع عمليّة إنتقال النسب أو ال Gears من دون أيّا هدر للطاقة.

 ​

ومش معقول نكون عم نحكي عن سيارة SUV صغيرة أو Crossover عصريّة، من دون ما تكون مزوّدة بنظام دفع رباعي All Wheel Drive. وبيتميّز النظام المُعتمد ب Tucson بإنّو بيرسل العزم للإطارات الخلفيّة بمجرّد إنزلاق واحد من الإطارات الأماميّة على الأقلّ. وعلى الطرقات الصعبة، من المُمكن تثبيت توزيع القوّة الحصانيّة بنسة 50 – 50 % بين المحورين الأمامي والخلفي عبر الضغط على زرّ خاص. وداخل المنعطفات، بيتولّى نظام Active Cornering Control All Wheel Drive كبح الإطار الداخلي نسبة لوجهة الإلتفاف، للحفاظ على التماسك، ولمنع الخروج عن المسار. 

وبالنسبة لأداء Hyundai Tucson 2016، فهُوّي بدورو صار أفضل من السابق، خاصة إنّو المُهندسين إشتغلوا كتير على مُكوّنات ال Suspension الذي صاروا بأمّنوا توازن أكبر على الطرقات الصعبة، من دون تغيير على مستوى راحة الجلوس. ومع نظام توجيه بيستفيد من مساعدة كهربائية صارت حركة ال Steering سلسة أكتر.

وبيستفيد سايق Hyundai Tucson من مساعدة إلكترونيّة مهمّة، بتشمل نظام كشف السيارات إلى جوانب Tucson، ونظام تشغيل المكابح تلقائياً بالحالات الطارئة، ونظام إختيار وضعيّة القيادة من بين 3 خيارات، ونظام هزّ ال Steering لتنبيه السايق من إنحراف سيارتو عن خط المسار. بسّ هالتجهيزات لكتير متطوّرة، والذي بتتوفّر عادة بفئات أكبر وأفخم، منّا مَوجُودة بكل الأسواق.

وبكل الأحوال، أكيد إنّو الجيل التالت الجديد من Hyundai Tucson حقّق خطوة كبيرة للأمام، مش بسّ على مستوى جاذبية وجرأة التصميم وفخامة وعملانية المقصورة، ولكن كمان على مستوى فعاليّة الأداء والمساعدة الإلكترونية المخصّصة للسايق. وكل هالشي بيُوعد بإستمرار نجاح هال Compact المدمج من إنتاج الشركة الكوريّة الأوّلي بكوريا، والكتير متقدّمة بالساحة العالميّة.