سنة 2009 وبالوقت يلّي كانت شركة Hyundai الكوريّة عم بتحقّق نجاحات كبيرة بكتير من الأسواق العالمية، أطلقت Genesis بهدف المنافسة بفئة ال Sedan المترفة. وبالرغم من عدم تحقيق إختراق حاسم بهالمجال، ما تردّدت Hyundai يلّي صارت سمعتا أفضل حالياً، ونجاحاتا أكبر، من تقديم الجيل التاني من Genesis يلّي خضعت لتحسينات كبيرة، ويلّي ما منبالغ إذا أكّدنا قدرتا على منافسة أهمّا السيارات الألمانية الفاخرة ضمن الفئة Sedan بفعاليّة كبيرة.

ولإنّو نجاح أيّا طراز جديد مرتبط كتير بالهيكل (Chassis)، فضّلت Hyundai ما تستخدم ال Aluminum، وإنّو تعتمد مواد معدنية كتير متينة (Ultra-high-strength steel)، بهدف الحصول على بنية أقسى (Stiffer body structure). وهالشي إنعكس إيجابياً على الأداء (Performance) بالرغم من إرتفاع الوزن، وصارت حركة هال Sedan هادية أكتر على الطريق، مع إرتفاع الصلابة الإلتوائية ( Bending Rigidity).   

وبالنسبة للقياسات، وبالرغم من إنّو الطول العام زاد بمقدار نصف Cm بسّ، كان لافت إنّو قاعدة العجلات (Wheelbase) صارت أطول بمقدار 7 سنتيمترات ونصف السنتيمتر. وعم نحكي عن Sedan بطول 5 أمتار، مع قاعدة عجلات بطول 3 أمتار.   

وعلى مستوى التصميم (Design)، بيستفيد الجيل التاني من Genesis من النمط التصميمي الجديد (New Style Fluidic Sculpture 2,0). وفينا نقول إنّو الخطوط إستفادت من تحسينات محافظة (Conservative update) باعتبار إنّو كل التحسينات ما خرجت عن الطابع الكلاسيكي، مع تأمين إنسيابية (Drag Coefficient) ممتازة. والتغيير لكتير واضح طال شبكة التهوية (ال Grille ) يلّي صارت ضخمة وأجمل من السابق، مع تحسينات على مستوى الإنارة من فئة "ليد" (LED Lamps). والخطوط الجانبية سلسة، مع سقف بطابع رياضي، خاصة من الجهة الخلفية يلّي بتنخفض تدريجياً لتلامس الصندوق (Boot) العملاني، ويلّي بيستفيد من نظام فتح ذكي ( Smart Opening System).

وبمجرّد الدخول للمقصورة (Cabin) بيشعر الركاب إنّن بسيارة فخمة (Luxury car) على مستوى المكونات (Components) والتجميع النهائي (Finish)، ونوعية المواد المستخدمة متل الجلد (Leather) وال Chrome والخشب (Wood) وغيرن، مع تجهيزات كاملة، على مستوى الراحة (Comfort) والسلامة (Safety). ومع إنّو تصميم لوحة القيادة ال (Dashboard) كلاسيكي، فهوّي بيستفيد من لمسات جمالية مختلفة. ومن ضمن التجهيزات الإضافية شاشة LCD كبيرة، و Head-up-display لتسهيل تزويد السايق بالمعلومات خلال القيادة. ومن بين أبرز الإبتكارات جهاز تحسّس لغازات CO2 داخل المقصورة (C02 Cabin Sensor) بيضبط نوعية الهوا وال Oxygen داخل المقصورة الرحبة (Spacious) ويلّي بتستفيد كمان من جوّ هادي (Calming Atmosphere). والمقاعد كتير فخمة، مع تحكم كهربائي (Electric Control ) للوضعية، ومع تهوية داخلية، ومع مساند من الممكن تعديل ضغط الهوا بداخلا.   

ومن ضمن التجهيزات الإلكترونية يلّي بتساعد على تجنّب الحوادث، مثبّت سرعة ذكي (Smart Cruise Control) بيتحكم أوتوماتيكياً بالسرعة في حال الإقتراب بشكل خطر من باقي السيارات على الطريق، وكاميرا تصوير ودعم (Back-up camera ) مع نظام تنبيه من السيارات العابرة (Cross-traffic alert system) لمساعدة السايق على الرجوع للخلف بشكل آمن، وكمان نظام المساعدة على الحفاظ على خط المسار (Active Lane-holding assistance).  

ميكانيكياً، المحرك الأبرز هوّي 3,8 Liter V6  بقوّة 315 حصان، مع إمكان إختيار محرك أقوى ببعض الأسواق، هوّي 5,0 Liter V8 . والتروس الأوتوماتيكية (Automatic Transmission)  من تطوير Hyundai بتتضمّن 8 نسب (8 Gears)، مع عتلات لتبديل النسب (Paddle Shifters). والتسارع من صفر لمية كلم/س. بتمّ بأقلّ من سبع ثوان، مع سرعة قصوى (Maximum Speed ) بتوصل ل 240 Km/h. ومتل ما التسارع Acceleration كتير نشيط، كمان نظام الكبح (ال Braking System ) كتير فعّال، بفضل ABS و EBD وأسطوانات كبيرة (Large Discs).

ومن ضمن التغييرات المهمّة مع الجيل التاني من Genesis، تقديم نظام دفع بالعجلات الأربعة (All-wheel-drive system) كتجهيز إختياري (Optional)، علماً إنّو هالنظام يلّي أطلقت علي Hyundai إسم HTRAC، تمّ تطويرو بالتعاون مع شركة Magna الكندية. وتوزيع العزم (Torque) هوّي بنسبة 40%  للأمام و60% للخلف بظروف القيادة العادية. ولكن عند تسجيل إنزلاق الإطارات الخلفية، من الممكن توصل نسبة العزم للأمام لحدود 90%. وعلى السرعات العالية بتمّ إرسال 100% من العزم للإطارات الخلفية لتحسين الثبات.

ومزايا Genesis الإلكترونية بتتضمّن ماصات صدمات متأقلمة (Adaptive Dampers ) بيستفيدوا من تحكّم مستقلّ ، ومن تكنولوجيا (Technology) كتير متطوّرة بتعزّز التوازن داخل المنعطفات (Corners) من خلال زيادة قساوة ال Suspensions الخارجية، بمقابل تخفيف قساوة ال Suspensions الداخلية.

إشارة إنّو بإمكان السايق (Driver) الإختيار من بين تلات وضعيات قيادة (3 Driving Modes)، هيّي: Eco يلّي بتخفّض الإستهلاك (Consumption)، والعادية (Normal) ، والرياضية (Sport) يلّي بترفع تجاوب المحرك وبتزيد قساوة ال Suspensions. وبكل الأحوال، التوازن صار أفضل بين التحكم بجسم السيارة (Body Control) وراحة الإنتقال (Ride Comfort)، مع توفّر نظام تحكم إلكتروني بالثبات (Electronic Stability Control).

ومن ضمن التغييرات بين الجيل السابق والجيل الحالي من Genesis، إستبدال نظام التوجيه الهيدروليكي (ال Hydraulically Assisted Steering) بمقود مع مساعد كهربائي (Electric Power Steering)، لتحسين دقّة التوجيه. ونجح المهندسين كمان برفع مدى شعور السايق بتماسك الإطارات بالطريق (ال Feedback)، من خلال تثبيت المحرك الكهربائي للمقود على محور الإلتفاف (ال Steering Track) ومش على مستوى ال Console متل ما بتمّ عادة.

باختصار، فينا نقول إنّو Genesis الجديدة هيّي Premium Sedan، بتأكّد بقوّة قدرات Hyundai الإنتاجية بأكتر من مجال، متل التصميم (Style) والراحة (Comfort)، ومتل متعة القيادة (ال Driving pleasure)، مع تطوير للتكنولوجيا (Technology). ومن خلال هالجيل التاني من Genesis يلّي تُعتبر من أهم ومن أفخم سيارات Hyundai، صارت خيارات الزباين (Customers) يلّي بحبّوا هالشركة الكورية الناجحة، كتير منوّعة من i10 ل Genesis مروراً بعروضات ال SUV.