بالإنتقال ل GLE Coupe يلّي بيتشارك كتير من المكوّنات أو ال Components مع "شقيقو" GLE العادي، فهوّي عبارة عن ردّ Mercedes المُباشر على BMW X6 بعد سنين طويلة من الإنتظار! وبالتالي، وبنتيجة النجاح الكبير يلّي حقّقتو الشركة البافاريّة مع X6 يلّي صار أخيراً بجيلو التاني، قرّرت Mercedes دخول المنافسة بشكل مباشر من خلال GLE Coupe الجديد كلياً، ويلّي بيتمتّع بطابع "رجولي"، علماً إنّو كلمة Coupe ما بتعني تقليدياً مع Mercedes إنّو جسم السيارة بيتكوّن من بابين، ولكنّ إنّو الطابع العام Coupe ورياضي.
وهالشي واضح كتير على مستوى التصميم، مع الإشارة إنّو الفئة Coupe أجمل من GLE العادي، وهيّي كمان أعرض، مع سقف أقلّ إرتفاعاً. وطبعاً، الطابع العام ديناميكي أكتر، مع خطوط إنسيابية من مختلف الجهات، خاصة من الخلف، علماً إنّو الواجهة الأماميّة "هُجوميّة" وجريئة، مع فتحات هوا متعدّدة. وبيبرز كمان خط السقف نصف الدائري، مع شبابيك مميّزة ودعائم جانبيّة ملتوية، بزاوية إنحناء كتير ضَيقة. ومن ضمن المميّزات التصميميّة، غطاء محرّك متموّج، متلو متل الأبواب الجانبيّة، وإطارات قياس 21 "إنش"، مع إمكان إختيار إطارات بقياس 22 "إنش" إضافياً. وإذا كانت مصابيح الإضاءة بالأمام والخلف بتعكس الطابع العصري الجذّاب للتصميم، فباقي المكوّنات الخارجية، ومنّا متلاً فتحات ال Exhaust والشفرات الجانبيّة وعواكس الهوا أو ال Spoilers قدّام وورا، بتأمّن النَفس الرياضي ولمسة الفخامة المَطلوبة من SUV عصري بيحمل إسم وشعار Mercedes. وفينا نقول إنّو Mercedes عم تُطلق مع GLE Coupe خط تصميمي جديد.
وداخل مقصورة GLE Coupe الفخامة ملموسة وواضحة، مِتلا متِل الطابع الرياضي. وهالشي مترجم من خلال الخشب وجلد Nappa وال Aluminum من جهة، ومن خلال الأشكال الرياضية والجذّابة للوحة القيادة أو ال Dashboard والكونسول الوسطي وغيرا من المُكونات من جهة تانية. وفينا نقول إنّو التحسينات مِتواصلة على مستوى تجهيزات الراحة والترفيه، وكمان على مستوى تجهيزات السلامة. وبالرغم من الشكل الديناميكي العام، من الخارج والداخل، العملانية متوفّرة، وصندوق التحميل كبير، مع باب خلفي بيفتح وبسكّر بتحكّم كهربائي.
ميكانيكياً، Mercedes GLE Coupe مزوّد بمحركات قويّة بتليق بطابعو الرياضي. ومَتلاً الفئة GLE 450 AMG Sport Coupe بتستفيد من محرّك V6 بسعة 3 ليترات مع 2 Turbo بولّد 362 حصان، علماً إنّو ال Transmission بتتميّز بإنّا من تسع نسب أماميّة مع تعشيق يدوي سريع في حال الرغبة، وهيّي من فئة 9G Tronic Plus. وبيبرز نظام الدفع الرباعي 4 Matic ويلّي بيشتغل بتحكّم إلكتروني كامل.
أمّا المحرك الأقوى فهوّي من نصيب Mercedes AMG GLE 63 S 4Matic، مع الإشارة إنّو من هلّق ورايح، رح نشوف AMG ورا إسم Mercedes مباشرة وقبل الفئة والرقم، ومش بالآخر متل بالسابق. وعم نِحكي عن V8 بسعة 5,5 ليترات مع 2 Turbo، بولّد 585 حصان. ومع هالمحرك يلّي بيتصل ب Transmission أوتوماتيكيّة من سبع نسب أمامية، ما في لزوم لشرح سهولة التجاوز على الطريق، ولا زخم التسارع النشيط. وبالرغم من الوزن المرتفع، ومن الحجم الكبير، الرشاقة واضحة، والديناميكيّة فعّالة، والتوازن مضمون.
والمكابح كتير فعّالين ومتجاوبين. وبالنسبة لل Suspension، فهيّي بتشتغل بضغط الهوا مع تحكّم إلكتروني، بأمّن إنخفاض ال SUV تلقائياً على السرعات العالية، مع زيادة القساوة بس يكون هالشي ضروري. ومن خلال Dynamic Select وضع المهندسين ب Mercedes مجموعة من برامج التحكم بتصرّف السايق، يلّي بإمكانو تعديل برمجة المحرك والمقود وال Gearbox وال Suspension. ومن بين التجهيزات الإلكترونيّة المتطوّرة Collision Prevention Assist يلّي هوّي عبارة عن نظام بساعد على تجنّب حوادث السير، وبيستفيد من تكنولوجيا الكبح التلقائي بالحالات الطارئة. وإضافياً كمان، من الممكن إختيار Distronic Plus لضبط السرعة ولتشغيل المكابح تلقائياً عند الضرورة. ومسألة ركن GLE Coupe بشكل سهل وآمن بتمّ بمساعدة من نظام Parktronic مع كاميرا تصوير خلفيّة وأجهزة تحسّس من مختلف الجهات.