بدايات Mercedes E-Class بترجع لسنة 1976، وبوقتا كان إسما W123، علمًا إنّو إسم E Class إستخدم إعتبارًا من سنة 1993. ونجاح هال Sedan العائليّة ساهم بإنتاجا بشكل متواصل ومكثف على مدى 40 سنة. واليوم، ومع تقديم الجيل العاشر لجديد كليًا من الفئة E، حقّقت Mercedes خطوات كبيرة على كل المُستويات، خاصة بالنسبة للفخامة الداخلية، وبالنسة للمستوى التكنولوجي المتطوّر يلّي بميّز كتير من التجهيزات.

البداية مع تصميم Mercedes E-Class لجديدة، ويلّي إستفادت من طول إجمالي إضافي مقارنة بالجيل السابق بلغ أكتر من 4 سنتيمترات. ولكن هالزيادة ترافقت مع زيادة طول قاعدة الإطارات أو ال Wheelbase ومع تقصير الرفاريف، بشكل خَلا التصميم يصير أقرب لسيارات Coupe من سيارات Sedan. وبشكل عام، تُعتبر الخطوط عصريّة وإنسيابيّة كتير من مختلف الجهات، مع واجهة أماميّة رياضيّة، ومع تموّجات على مستوى لبواب بتكسر الطابع الرصين للجوانب. وبتبرز الإضاءة العصريّة والقويّة قدّام وورا، علمًا إنّو الجهة الخلفيّة بتستفيد كمان من خط من ال Chrome ومن Exhaust بشكل ديناميكي. وباختصار، صار التصميم أجمل من السابق، مع فخامة معزّزة، ومع ديناميكيّة أفضل.  

ومن الضروري الإشارة إنّو Class E بتتوفّر بواجهة أماميّة بشكلين مختلفين، تبعًا للفئة يلّي بيختارا المستهلك من بين أربع فئات متوفّرة. وبهالإطار، الفئة القياسيّة والفئة Exclusive مزوّدين بنجمة Mercedes الثلاثيّة فوق شبكة تهوئة أو Grill ، بينما بالفئتين Avantgarde و AMG، علامة Mercedes بتزيّن وسط ال Grill.

بالإنتقال لمقصورة الجيل العاشر من Mercedes E Class، كان الهدف خلال عمليّة تطوير المكوّنات والتجهيزات المختلفة، تأمين مستوى راحة كتير عالي، إضافة طبعًا لرفع مستوى الفخامة لأقصى الدرجات. وبفضل زيادة "قاعدة الإطارات" بمقدار 6 سنتيمترات ونصّ، تحسّنت المساحات المخصّصة للركّاب بالجهتين الأمامية والخلفيّة، خاصة إنّو شكل المقاعد الفخمة والمريحة مدروس كمان لتعزيز العملانيّة. ومن المُمكن إضافيًا إختيار فتحة سقف Panoramic من الحجم الكبير. والخيارات واسعة أمام الزباين بالنسبة للمكوّنات الداخلية، نتيجة تعدّد أنواع الأخشاب والألومنيوم والجلد وغيرا من المواد المترفة المتوفّرة. ويُعتبر ال Steering رياضي، ومنلاحظ كمان الشكل الدائري لفتحات المكيّف.

ومن بين أبرز المميّزات الداخليّة، لوحة قيادة من وحي ال Dashboard لجديد بالفئة S، بتنقسم لجزئين، كل جزء منّا مزوّد بشاشة عرض TFT بنقاوة عرض كتير عالية. والشاشة قدّام عينين السايق مخصّصة للعدّادات ولمعلومات القيادة الأساسيّة، بينما الشاشة الوسطيّة بتستخدم لعرض خرايط ال Navigator والمعلومات الخاصة بالترفيه وبالتواصل الرقمي. ومن بين أبرز التجهيزات المتوفّرة بالفئة E، نظام موسيقي Burmester مع 23 Speakers بأمّنو بثّ كتير عالي ونقي. من جهة تانية، تجهيزات السلامة متوفّرة لكل الركّاب بشكل بواكب أحدث الإبتكارات من Mercedes.

وبعد ما إستعرضنا أبرز المُواصفات التصميميّة الداخليّة والخارجيّة ل E Class بجيلا العاشر، صار وقت نتعرّف على الجانب الميكانيكي من هال Sedan الفخمة بفئتا. وبالنسبة لمحرّكات البنزين، الخيارات بتبلّش مع محرك صغير بسعة ليترين بولّد 184 حصان، علمًا إنّو المحركات من 4 Cylinders بتشمل كمان محرك تاني بقوّة 245 حصان. وبالإنتقال لمحرك V6 ويلّي بيتوفّر حصريًا مع نظام دفع بالإطارات الأربعة فهوّي بولّد 333 حصان. والخيارات المتوفّرة بتضمّ كمان محرك Hybrid بيتميّز بقوّتو العالية إلى جانب إنخفاض إستهلاكو للبنزين، وهالنظام الهجين بولّد 279 حصان.

وبالنسبة لل Transmission الأوتوماتيكيّة فهيّي بتتميّز بإنّا بتتضمّن 9 نسب أماميّة، وكمان بتأمينا سرعة إنتقال بين النسب، من دون التسبّب بضجيج دوران كبير للمحرك. وإلى جانب الفئات يلّي بتندفع بإطاراتا الخلفيّة، بتبرز الفئة يلّي مزوّدة بنظام دفع بالإطارات الأربعة، مع تحكم إلكتروني بعالج أيّ إنزلاق بسرعة كبيرة، وبساعد على الحفاظ على التوازن العام على الطريق.

على مُستوى الأداء، بتتمتّع Mercedes E Class بمختلف فئاتا، بفعالية كبيرة على الطريق، حتى مع المحركات الصغيرة نسبيًا، ويلّي بتتفوّق على مُستوى معدّل إستهلاك البنزين. ومتلاً المحرّك القياسي سعة ليترين بأمّن التسارع من صفر لمية كلم/س. خلال 7,7 ثوان، بالتزامن مع نسبة إستهلاك للبنزين بتبلغ 6 ليترات بسّ لكل مية كيلومتر. وأرقام التسارع بتتحسّن مع الفئات المزوّدة بمحركات أقوى، ومن المُمكن تُوصل لحدود 5 ثواني للإنطلاق من صفر لسرعة مية مع الفئة E400 – 4 Matic المزوّدة بمحرك V6 وبنظام دفع رباعي.

واللافت إنّو هالقوّة العالية بتترافق مع توازن لافت على الطريق، ومع هدوء واضح داخل المقصورة، وكمان مع تحكّم مميّز من قبل السايق من ورا ال Steering. وهالشي، ما بيرجع بسّ للهيكل المتين، ولتوزيع الوزن المدروس، ولتطوّر ال Suspension، ولكان كمان لمجموعة كبيرة من التجهيزات الإلكترونية يلّي بتلعب دور كبير بالسيطرة والتحكّم وبتجنّب الحوادث. ومن هالتجهيزات المتطوّرة منذكر متلاً، نظام تشغيل المكابح أوتوماتيكيًا بالحالات الطارئة، ونظام التوجيه النشيط يلّي بيتدخّل على مستوى ال Steering للمساعدة على تجنّب الإصطدامات. ومن بين التجهيزات كمان، نظام Attention Assist يلّي براقب مدى تركيز السايق، ونظام Drive Pilot يلّي بحافظ على مسافة آمنة بين الفئة E والسيارات قدّاما خلال تشغيل ال Cruise Control، ونظام تبديل خط المسار بشكل آمن، وغيرا من الأنظمة. وما مننسى الإشارة لتقنيّة الركن الأوتوماتيكي، ويلّي هيّي عبارة عن نظام متطوّر بيسمح للسايق بركن E Class بعد خروجو منّا. وهالشي بتمّ عبر توجيهات من الهاتف "الذكي" يلّي بيتحوّل ل Remote Control للتحكّم بحركة السيارة عن بعد، بشكل كتير مفيد بالأماكن الضيّقة.

وبالختام، فينا نقول إنّو الجيل العاشر من Mercedes E Class صار من بين أفضل السيارات بالفئة يلّي بنافس فيا، بعد ما زاد حُضورو ومستوى جاذبيّتو وفخامتو، والأهم بعد ما صار يستفيد من أهم التجهيزات الإلكترونية والتكنولوجيّة المتطوّرة المتوفّرة بعالم صناعة السيارات اليوم.